झापा, फागुन ३ – नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले सदन र सडकबाट भ्रष्टाचारविरुद्धको अभियान निरन्तर अघि बढ्ने बताएका छन्।
झापाको दमक नगर समितिको दोस्रो अधिवेशन उद्घाटन तथा खबरदारी सभालाई सम्बोधन गर्दै उनले भ्रष्टाचारविरुद्धको संघर्षलाई पार्टीको देशव्यापी अभियानका रूपमा अघि बढाइने बताए।
उनले तेस्रोपटक प्रधानमन्त्री बनेपछि भ्रष्टाचारविरुद्ध युद्ध लड्ने सङ्कल्प लिएको स्मरण गराउँदै सरकारबाट बाहिरिएपछि सुशासनका लागि देशव्यापी अभियान सुरु गरिएको उल्लेख गरे। "मैले सरकारको नेतृत्व गर्दा भ्रष्टाचारविरुद्ध, विभेद अन्त्य गर्दै सामाजिक न्यायका पक्षमा अभियान थालेको थिएँ। अब यो अभियान जनताको बनेको छ, जसलाई निरन्तर अघि बढाइनेछ," उनले भने।
अध्यक्ष प्रचण्डले केही शक्तिहरू संविधानलाई कमजोर बनाउने प्रयत्न गरिरहेको आरोप लगाए। "अहिलेका प्रधानमन्त्री शक्ति प्राप्त गर्नासाथ संविधान च्यात्न खोज्नुहुन्छ, किनकि यो संविधान उहाँलाई मन परेको छैन। संघीयता र उत्पीडित समुदायको अधिकार उहाँलाई मन परेको छैन," उनले भने। केही शक्तिहरू अझै पनि प्रतिगमन चाहने मनसायमा रहेको दाबी गर्दै उनले माओवादी पार्टी जनताको अधिकार थप संस्थागत गर्न प्रतिबद्ध रहेको बताए।
जनयुद्धमार्फत संघीय लोकतान्त्रिक गणतन्त्र स्थापनाका लागि नेतृत्व गर्ने अवसर पाएको उल्लेख गर्दै अध्यक्ष प्रचण्डले अब भ्रष्टाचारविरुद्धको अभियानलाई तीव्र बनाउँदै समाजवादी क्रान्तिका लागि अघि बढ्ने प्रतिबद्धता जनाए। "झापा, विराटनगरजस्ता स्थानहरू सामन्तवादविरोधी आन्दोलनका केन्द्र थिए। अब पूर्वकै अगुवाइमा भ्रष्टाचारविरोधी अभियान प्रभावकारी बनाउँदै समाजवादी क्रान्तिको नेतृत्व गर्ने विश्वास लिएको छु," उनले भने।
प्रधानमन्त्रीका रूपमा पहिलो कार्यकालमा मध्यपहाडी लोकमार्ग, मदन भण्डारी लोकमार्ग, उत्तर-दक्षिण कोरिडोरजस्ता परियोजनाहरू अघि बढाएको र दोस्रो कार्यकालमा संविधान कार्यान्वयन तथा लोडसेडिङ अन्त्यमा ध्यान दिएको उनले स्मरण गराए। तेस्रो कार्यकालमा सुशासन, सामाजिक न्याय, समृद्धि, नेपाल-भारत-बङ्गलादेशबीच त्रिदेशीय विद्युत् व्यापार सम्झौता, सीमा समस्या समाधान, चीनसँग आठ वटा नाका खोल्ने तथा कृषि उत्पादन वृद्धि गर्ने पहल गरिएको उनले बताए।
अन्तर्राष्ट्रिय मञ्चहरूमा नेपालको पक्षमा दृढ रूपमा आवाज उठाइएको भन्दै उनले भ्रष्ट र बिचौलियाहरूलाई सरकारको सफलता मन नपरेर षड्यन्त्रपूर्वक ढालिएको आरोप लगाए। "अब सरकार बाहिरिएपछि म जनतासँग प्रत्यक्ष जोडिने अवसर पाएको छु। यसले माओवादीप्रति जनताको आकर्षण झन् बढ्दै गएको छ," उनले थपे।
अञ्जना ढकाल
प्रतिक्रिया दिनुहोस