काठमाडौं, चैत्र २० - चैत १५ गते शुक्रबार राजावादी प्रदर्शनकारीहरूले जडीबुटी उत्पादन तथा प्रशोधन कम्पनी लिमिटेडमा तोडफोड र आगजनी गरिएको थियो। आगलागीबाट कम्पनीलाई २८ करोड रुपैयाँ बराबरको क्षति पुगेको प्रारम्भिक अनुमान गरिएको छ।
कम्पनीकी महाप्रबन्धक संगीता यादवका अनुसार ‘गुड म्यानुफ्याक्चरिङ प्राक्टिस’ (जीएमपी) अनुसार सञ्चालित भवनलगायत स्वचालित उपकरण जलेर ध्वस्त हुँदा उत्पादन ठप्प भएको छ। उनले अस्थायी संरचना निर्माण गरेर भए पनि उत्पादन पुनः सुरु गर्न सरकारसँग १० करोड सहयोग मागिएको बताइन्।
कम्पनीमा औषधि उत्पादनका लागि प्रयोग गरिएका कच्चापदार्थ, उपकरण, फर्निचर, कागजात तथा प्याकेजिङ सामग्री जलेर खरानी भएका छन्। परिसरमा रहेका एक दर्जन बढी गाडी तथा मोटरसाइकल जलाइएका छन्।
यादवले कम्पनी पुनः आफ्नै खुट्टामा उभ्याउन आवश्यक सहयोगको अपेक्षा राखेको बताउँदै भनिन्, "यो सरकारको गर्व गर्ने संस्था हो, यसलाई बचाउनु जरुरी छ।"
सरकारी स्वामित्वको यो कम्पनी २०३८ सालमा स्थापना भई २०५६ सालदेखि सञ्चो उत्पादन गर्दै आएको छ। सञ्चो तेल विगत १५ वर्षदेखि स्विडेनलगायत देशहरूमा निर्यात हुँदै आएको छ।
कम्पनीले देशभर शाखा विस्तार गर्दै नयाँ उत्पादनसमेत ल्याउने तयारी गरिरहेको थियो। यादवका अनुसार यदि तत्काल उत्पादन पुनः सुरु गर्न नसकिए विदेशी उत्पादनहरूले बजार कब्जा गर्ने खतरा छ।
हाल कम्पनी पुनः सञ्चालनका लागि भग्नावशेष पन्छाउने काम भइरहेको छ। यादवले उत्पादन पुनः सुचारु गर्न सरकारी सहयोग आवश्यक रहेको बताउँदै सबै पक्षको साथको अपेक्षा गरेकी छन्।
अञ्जना ढकाल
प्रतिक्रिया दिनुहोस