गणतन्त्रको चिन्ता हाम्रो कर्तव्य र प्रतिबद्धता हो : प्रचण्ड

अञ्जना ढकाल

१ बर्ष अघि

पाठक संख्या १३३

काठमाडौं, साउन ७ – नेपाल कम्युनिष्ट पार्टी (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले गणतन्त्रको संरक्षण र सुदृढीकरणप्रति आफूहरू सबैभन्दा बढी जिम्मेवार रहेको बताएका छन्।

बुधबार राजधानीमा आयोजित “गणतन्त्र अगाडि र पछाडिको नेपाल” शीर्षक पुस्तक विमोचन कार्यक्रममा बोल्दै प्रचण्डले लामो संघर्ष र बलिदानबाट प्राप्त गणतन्त्र अहिले प्रश्नको घेरामा पर्न थालेकोप्रति गम्भीर चासो व्यक्त गरे।

उनले आन्दोलन र परिवर्तनका दिनहरू सम्झिँदै भने, “जसरी आमा आफ्ना सन्तानप्रति माया गर्छिन्, त्यस्तै माया हामीलाई गणतन्त्रप्रति छ। काठमाडौँमा आयोजित हाम्रो विशाल प्रदर्शन त्यो माया र प्रतिबद्धताको प्रतीक थियो।”

प्रचण्डले माओवादी आन्दोलनको उपलब्धिबाट महिला, दलित, आदिवासी तथा जनजाति समुदायले प्राप्त गरेका अधिकार आज संस्थागत भइसकेको उल्लेख गर्दै ती अधिकार उल्ट्याउन सकिने अवस्था नरहेको स्पष्ट पारे।

उनले पछिल्लो समय वैचारिक सिद्धान्त, संघर्ष र त्यागमा आधारित आन्दोलन तथा नेताहरूलाई हल्का रूपमा लिने, सस्तो आलोचना गर्ने प्रवृत्ति बढ्दो रहेको भन्दै चिन्ता व्यक्त गरे।

त्यस्तै उनले पुस्तक विमोचन कार्यक्रमलाई अवसर बनाउँदै गहन अनुसन्धान र विश्लेषणमा आधारित कृतिहरूले देशको सामाजिक, राजनीतिक र वैचारिक दिशालाई मार्गदर्शन गर्न सक्ने विश्वास समेत व्यक्त गरे।

प्रचण्डको भनाइले वर्तमान राजनीतिक बहसमा गणतन्त्रको महत्व र संरक्षणबारे पुनः सोच्नुपर्ने आवश्यकता देखिएको छ।