छबिलाल जोशीलाई काठमाडौं ल्याइयो, सहकारी ठगी प्रकरणमा बयान सुरु

Chhabilal

अञ्जना ढकाल

२ बर्ष अघि

पाठक संख्या ९६

सहकारी ठगी प्रकरणमा कास्की प्रहरीले पक्राउ गरेका पूर्व डीआईजी र गोर्खा मिडियाका पूर्व सञ्चालक छबिलाल जोशीलाई काठमाडौं ल्याइएको छ।

पोखराको सूर्यदर्शन सहकारीमा बचत अपचलनको आरोपमा असोज ६ गते कास्कीमा पक्राउ परेका जोशीलाई मंगलबार बेलुका फ्लाइटमार्फत काठमाडौं ल्याइएको हो। काठमाडौं जिल्ला अदालतले स्वर्णलक्ष्मी सहकारीको बचत अपचलनसम्बन्धी मुद्दामा पक्राउ पुर्जी जारी गरेपछि उनलाई काठमाडौं ल्याइएको जिल्ला प्रहरी परिसर काठमाडौंका प्रमुख एसएसपी बसन्त रजौरेले जानकारी दिए।

"उहाँलाई हिजो बेलुका काठमाडौं ल्याइएको छ र परिसरको हिरासतमा राखिएको छ। आजबाट अनुसन्धान सुरु हुन्छ," एसएसपी रजौरेले भने।

यसअघि, रूपन्देहीको सुप्रिम सहकारीमा पनि बचत हिनामिनाको आरोपमा जोशीविरुद्ध पक्राउ पुर्जी जारी गरिएको थियो। त्यसैगरी, राष्ट्रिय स्वतन्त्र पार्टीका सभापति रवि लामिछानेविरुद्ध पनि स्वर्णलक्ष्मी सहकारीको मुद्दामा पक्राउ पुर्जी जारी गरिएको छ।

जोशीको बयानपछि लामिछानेलाई पनि काठमाडौं ल्याउने तयारी भइरहेको प्रहरीले जनाएको छ। यसअघि, सोही प्रकरणमा संलग्न अन्य व्यक्तिहरूलाई बयानका लागि विभिन्न स्थानमा लगिएको थियो।