काठमाडौँ, फागुन ८ - गायक कुमा सागरलाई गिज्याएको आरोपमा कारबाहीको माग गर्दै सम्पदा संरक्षण महाअभियानले बिहीबार काठमाडौंमा प्रदर्शन गरेको छ। भद्रकालीस्थित जिल्ला प्रहरी परिसर अगाडि भएको प्रदर्शनमा नेवार समुदायका व्यक्तिहरू सहभागी थिए।
फागुन ५ गते कमेडियन सजन श्रेष्ठ, उत्सव सापकोटा, पडकास्टर सुशान्त प्रधान र गायक सुजन जिम्बाविरुद्ध उजुरी दिइएको थियो। उजुरीमा नेवारी भाषा, संस्कृति र परम्परालाई अपमानजनक रूपमा प्रस्तुत गरिएको भन्दै कानुनी कारबाहीको माग गरिएको थियो।
श्रेष्ठले सञ्चालन गरेको पडकास्टमा अतिथिका रूपमा पुगेका अन्यले गायक सागरलाई व्यंग्य गर्दै गीत गाएका थिए। विवादपछि उक्त भिडियो युट्युबबाट हटाइएको छ भने श्रेष्ठले माफी समेत मागिसकेका छन्।
तर, उजुरी दिएको ४८ घण्टाभन्दा बढी भइसक्दा पनि कारबाही अघि नबढेको भन्दै प्रदर्शन गरिएको हो। प्रदर्शनमा सहभागी एक जनाले भने, ‘हाम्रो मातृभाषाको लवजलाई अश्लील तथा हेय भावले प्रस्तुत गर्दै सामाजिक सद्भावमा खलल पुर्याउनेहरूलाई अहिलेसम्म पक्राउ नगरेको हुँदा दबाब दिन प्रदर्शन गरेका हौँ।’
यस विषयमा जिल्ला प्रहरी परिसर काठमाडौंका प्रवक्ता अपिल बोहराले दुबै पक्षलाई छलफलका लागि बोलाइएको जानकारी दिएका छन्। उनका अनुसार चारै जना प्रहरी सम्पर्कमा रहेका छन् र शुक्रबार छलफल गरिनेछ।
अञ्जना ढकाल
-1579.jpeg)
प्रतिक्रिया दिनुहोस