एकै दिन दुई युवतीसँग बिहे गरेर युवक फरार

अञ्जना ढकाल

२ हप्ता अघि

पाठक संख्या ६७

गोरखपुर, चैत्र १२ – उत्तर प्रदेशको गोरखपुरमा एक युवक एकै दिन दुई युवतीसँग विवाह गरेपछि फरार भएका छन्। घटनाबारे उजुरी परेपछि प्रहरीले अनुसन्धान थालेको छ।

गोरखपुरको हरपुर बुदहट क्षेत्रमा बस्ने ती युवकले बिहान प्रेमिकासँग ‘कोर्ट म्यारिज’ गरेका थिए। तर, बेलुका भने परिवारको रोजाइकी युवतीसँग धार्मिक परम्पराअनुसार विवाह गरे।

बिहान कोर्ट म्यारिज गरेकी प्रेमिकाले युवकको घरमै पुगेर आफूहरू कानुनी रूपमा पति-पत्नी भइसकेको जानकारी गराइन्। तर, युवकका परिवारले उनलाई गालीगलौज गर्दै घरबाट निकालिदिए। त्यसपछि उनले प्रहरी कार्यालयमा गएर घटनाको उजुरी दिएकी थिइन्।

प्रेमिकाका अनुसार ती युवकसँग उनको चार वर्षअघिदेखि प्रेम सम्बन्ध थियो। उनीहरू केही समय ‘लिभ-इन’ सम्बन्धमा बसेका थिए। यस अवधिमा दुई पटक गर्भपातसमेत गराएको उनले बताइन्। जब युवकका परिवारले उनलाई अरूसँग विवाह गरिदिने निर्णय गरे, तब बाध्य भएर कोर्ट म्यारिज गरेको उनको भनाइ छ।

तर, कोर्ट म्यारिजको राति नै युवक परिवारको दबाबमा अर्को युवतीसँग विवाह गर्न गए।

गोरखपुरका प्रहरी अधिकृत जितेन्द्र कुमार श्रीवास्तवका अनुसार घटनाबारे उजुरी परेपछि युवकलाई छलफलका लागि बोलाइएको थियो। तर, त्यसअघि नै उनी फरार भएका छन्। प्रहरीले उनको खोजी कार्य जारी राखेको जनाएको छ।