प्रतिकूल मौसमका कारण केही क्षेत्रमा विद्युत् अवरुद्ध, लोडसेडिङ भने होइन : प्राधिकरण

अञ्जना ढकाल

हिंजो प्रकाशित

पाठक संख्या ३२

काठमाडौं, वैशाख २ – नेपाल विद्युत् प्राधिकरणले देशका केही स्थानहरूमा हालै देखिएको विद्युत् अवरुद्धको कारण लोडसेडिङ नभई प्रतिकूल मौसम र हावाहुरी भएको स्पष्ट पारेको छ।

प्राधिकरणले एक विज्ञप्ति जारी गर्दै प्रि–मनसुनसहितको प्रतिकूल मौसम र हावाहुरीका कारण केही ठाउँमा विद्युत् आपूर्ति छोटो समयका लागि रोकिएको भए पनि यसलाई लोडसेडिङको रूपमा बुझ्नु भ्रामक र अतिरञ्जित हुने दाबी गरेको छ।

“देशका विभिन्न क्षेत्रमा आएको हावाहुरी तथा प्रि–मनसुनका कारण सिर्जना भएको प्रतिकूल मौसमले विद्युत् सेवा केहीबेर अवरुद्ध भएको हो। तर सामाजिक सञ्जालमा यसलाई लोडसेडिङ भनेर अतिरञ्जित र भ्रामक प्रचार गरिएकोप्रति हाम्रो गम्भीर ध्यानाकर्षण भएको छ,” विज्ञप्तिमा उल्लेख छ।

प्राधिकरणका अनुसार विद्युत् अवरुद्ध भएका अधिकांश स्थानमा आपूर्ति पुनः सुरु भइसकेको छ भने बाँकी ठाउँहरूमा वितरण केन्द्रमार्फत प्राविधिक टोलीहरू खटिएर समस्याको समाधानमा जुटिरहेका छन्।

यसैबीच, प्राधिकरणले नागरिकलाई अफवाहमा नपर्न आग्रह गर्दै मौसमको कारणले हुने अस्थायी अवरोधलाई लोडसेडिङसँग नजोड्न पनि आग्रह गरेको छ।