रसुवाको मितेरी पुल बाढीले बगायो, नेपाल–चीन सम्पर्क टुट्यो

अञ्जना ढकाल

७ घण्टा अघि

पाठक संख्या ५८

रसुवा, असार २४ - नेपाल–चीन सीमामा रहेको प्रमुख नाका रसुवागढीस्थित मितेरी पुल भीषण बाढीका कारण बगाएको छ ।

तिब्बत क्षेत्रबाट अचानक आएको बाढीले पुल मात्र नभई नेपालतर्फ जनधनको समेत ठूलो क्षति गरेको छ । यद्यपि हालसम्म क्षतिको यकिन विवरण सार्वजनिक भएको छैन।

चीनको सहयोगमा निर्माण गरिएको सो पुल २०७६ सालको जेठ महिनामा सञ्चालनमा आएको थियो । पुल निर्माणमा तिब्बती इन्जिनियरिङ कम्पनी लिमिटेड (तान सुन रोड एन्ड ब्रिज) ले जिम्मा लिएको थियो । जम्मा पाँच महिनाको अवधिमा पुल निर्माण कार्य सम्पन्न गरिएको थियो।

११० मिटर लामो र ९ मिटर चौडा सो पुल नेपाल र चीनबीचको प्रमुख व्यापारिक तथा आवागमन नाका मानिन्थ्यो। अहिले पुल बगेसँगै दुई देशबीचको सम्पर्क पूर्णरूपमा टुटेको छ।

पुलको पुनःनिर्माण कहिले, कसरी र कसको लगानीमा गरिने भन्ने विषयमा अहिलेसम्म स्पष्टता आइसकेको छैन। स्थानीय प्रशासन र सम्बन्धित निकायहरू क्षतिको मूल्यांकन गर्न व्यस्त छन्।

यस घटनाले चीनसँगको नेपालको व्यापार तथा कूटनीतिक सम्बन्धमा पनि अस्थायी प्रभाव पार्ने देखिएको छ।