समाजवादी मोर्चाको बैठकमा पहिलोपटक वामदेव गौतमको उपस्थिति

अञ्जना ढकाल

१ बर्ष अघि

पाठक संख्या ११५

काठमाडौं, साउन १३ - समाजवादी मोर्चाको मंगलबार बसेको बैठकमा पूर्वउपप्रधानमन्त्री वामदेव गौतम पहिलोपटक सहभागी भएका छन्। नेकपा एकीकृत समाजवादीको केन्द्रीय कार्यालयमा आयोजित बैठकमा गौतमले पार्टी एकीकरणपछि औपचारिक सहभागिता जनाएका हुन्।

सेतो सर्ट, निलो कोर्ट पाइन्ट र ढाका टोपीमा सजिएका गौतम बैठकमा अध्यक्ष माधवकुमार नेपालको छेउमै बसेका थिए। गत साउन २ गते एकीकृत समाजवादीमा औपचारिक रूपमा प्रवेश गरेका गौतमलाई पार्टीले वरिष्ठ नेता तथा तेस्रो वरियताको जिम्मेवारी दिएको छ।

यद्यपि, आजको बैठकमा पार्टीका सम्मानित नेता तथा पूर्वप्रधानमन्त्री झलनाथ खनाल भने अनुपस्थित रहेका छन्।

गौतमको सहभागिताले समाजवादी मोर्चाको आन्तरिक संरचना र रणनीतिमा नयाँ ऊर्जा थप्ने अपेक्षा गरिएको छ। पार्टी एकीकरणपछि पहिलोपटक सार्वजनिक रूपमा देखिएका गौतमको उपस्थितिलाई नेताहरूले सकारात्मक संकेतका रूपमा हेरेका छन्।