कमजोर नतिजापछि एमालेमा ओली नेतृत्वमाथि प्रश्न

अञ्जना ढकाल

६ महिना अघि

पाठक संख्या १४२

काठमाडौं, फागुन २५ - प्रतिनिधिसभा निर्वाचनमा अपेक्षाभन्दा कमजोर प्रदर्शन गरेपछि नेकपा एमालेभित्र नेतृत्वको विषयलाई लिएर बहस सुरु भएको छ। पार्टीभित्र केही नेताहरूले अध्यक्ष केपी शर्मा ओलीले निर्वाचन परिणामको जिम्मेवारी लिएर मार्गप्रशस्त गर्नुपर्ने धारणा राख्न थालेका छन्।

उपाध्यक्ष विष्णु पौडेलले निर्वाचन परिणाम सार्वजनिक हुन थालेपछि पार्टीभित्र गम्भीर समीक्षा आवश्यक भएको बताएका छन्। उनले सामाजिक सञ्जालमार्फत पार्टीको नीति, संगठन र नेतृत्वलाई जनअपेक्षाअनुसार सुधार गर्नुपर्ने संकेत गरेका छन्।

उपाध्यक्ष पृथ्वी सुब्बा गुरुङले पनि नेतृत्व परिवर्तनको विषयमा सकारात्मक धारणा राखेको बताइएको छ। उनका अनुसार पार्टीलाई नयाँ ढंगले अघि बढाउन नेतृत्वमा परिवर्तन आवश्यक हुन सक्छ।

उपमहासचिव योगेश भट्टराईले निर्वाचन परिणामले पार्टीप्रति जनतामा असन्तुष्टि देखिएको बताएका छन्। उनले पार्टीभित्र नीति र कार्यशैलीबारे खुला छलफल गरेर सुधारको बाटो खोज्नुपर्ने धारणा व्यक्त गरेका छन्।

यता, इतर समूहका नेताहरू भने तत्काल स्पष्ट रूपमा प्रतिक्रिया नदिई परिस्थितिको मूल्यांकन गरिरहेका छन्। उनीहरूका अनुसार केवल नेतृत्व परिवर्तन मात्र नभई समग्र पार्टी संरचनामा सुधार आवश्यक छ।

यसपटकको निर्वाचनमा एमाले प्रत्यक्षतर्फ सीमित सिटमा खुम्चिएको छ भने समानुपातिकतर्फ पनि अपेक्षाभन्दा कम मत आएको छ। यही कारण पार्टीभित्र नेतृत्व र नीतिको पुनरावलोकन गर्नुपर्ने आवाज बलियो बन्दै गएको छ।