कांग्रेसको १५औँ महाधिवेशन रोक्न देउवा र पूर्णबहादुर खड्काको पक्षबाट सर्वोच्चमा छुट्टाछुट्टै रिट

अञ्जना ढकाल

१ हप्ता अघि

पाठक संख्या ६१

काठमाडौं, भदौ ८ - नेपाली कांग्रेसको १५औँ महाधिवेशनका लागि अघि बढाइएको प्रक्रिया रोक्न माग गर्दै पूर्वसभापति शेरबहादुर देउवा र तत्कालीन कार्यवाहक सभापति पूर्णबहादुर खड्काको पक्षबाट सर्वोच्च अदालतमा छुट्टाछुट्टै रिट दायर गरिएको छ।

देउवा पक्षले असोजमा गर्ने भनिएको महाधिवेशनको तयारी तत्काल रोक्न माग गर्दै सर्वोच्चको शरण लिएको हो। यसअघि शुक्रवार पेस गरिएको रिट निवेदन सच्याउनुपर्ने भएपछि फिर्ता लगिएको थियो। सोमबार भने देउवा र खड्काको तर्फबाट कानून व्यवसायीमार्फत अलग–अलग रिट दायर गरिएको कांग्रेस नेता मीनबहादुर विश्वकर्माले जानकारी दिए।

रिटमा पार्टीको आधिकारिकतासम्बन्धी विवादमा सर्वोच्च अदालतले पुनः सुनुवाइका लागि निस्सा दिइसकेको अवस्थामा त्यसको अन्तिम टुंगो नलागेसम्म महाधिवेशनसम्बन्धी प्रक्रिया अघि बढाउन नहुने तर्क गरिएको छ। देउवा पक्षले यही विषयलाई आधार बनाएर कांग्रेसले सार्वजनिक गरेको महाधिवेशन कार्यतालिका रोक्न माग गरेको हो।

कांग्रेसले आगामी असोज १६ देखि १९ गतेसम्म १५औँ महाधिवेशन गर्ने गरी कार्यतालिका सार्वजनिक गरिसकेको छ। यसैबीच इतर पक्षको भेलाले गगन थापालाई सभापतिको रूपमा स्वीकार नगर्ने र देउवाकै नेतृत्वमा महाधिवेशनमा जाने निर्णय गरेको बताइएको छ।

महाधिवेशनको मिति नजिकिँदै गर्दा पार्टीभित्रको नेतृत्व र आधिकारिकतासम्बन्धी विवाद थप कानूनी प्रक्रियामा पुगेपछि कांग्रेसको महाधिवेशन निर्धारित समयमा हुने–नहुने विषयमा अन्योल बढेको छ।