झापा, माघ १६ – सहिद दिवसको अवसरमा सहित स्मृति प्रतिष्ठान, बिर्तामोड द्वारा एक विशेष कार्यक्रम सम्पन्न भएको छ। कार्यक्रममा राष्ट्रका लागि बलिदान दिने वीर सहिदहरूको सम्झना गर्दै श्रद्धाञ्जली अर्पण गरिनुका साथै उनीहरूको योगदानको महत्त्वबारे गहन छलफल गरिएको थियो।
कार्यक्रमको अध्यक्षता प्रतिष्ठानका अध्यक्ष नरेश खरेलले गर्नुभएको थियो भने प्रमुख अतिथि पवित्रा महतरा प्रसाई रहनुभएको थियो। त्यस कार्यक्रममा प्रतिष्ठानका सचिव रोमणि भट्टराई, कोषाध्यक्ष बुद्धिराम भट्टराई, कुलप्रसाद खरेल, मनमोहन मेमोरियल पूर्वाञ्चल कलेजका क्याम्पस प्रमुख जयप्रसाद खतिवडा, तथा सहिद स्मृति प्रतिष्ठान इन्जिनियरिङ कलेजका क्याम्पस प्रमुख सुभाष पौडेल लगायतका विशिष्ट अतिथिहरूको उपस्थिति रहेको थियो।
वक्ताहरूले लोकतन्त्र, राष्ट्रिय एकता, र सामाजिक न्यायका लागि सहिदहरूले देखाएको मार्गलाई पछ्याउनुपर्ने आवश्यकता बारे विशेष जोड दिए।
यस अवसरमा इन्जिनियरिङ संकायका विद्यार्थीहरूले भवन तथा पुलहरूको नवीनतम नमुना (मोडेल) प्रस्तुत गरी आधुनिक प्रविधि र पूर्वाधार विकासको महत्त्व दर्शाएका थिए। उनीहरूको प्रस्तुतिले सहिदहरूले परिकल्पना गरेको समृद्ध नेपालको मार्गचित्रलाई प्रविधिको माध्यमबाट कसरी मूर्तरूप दिन सकिन्छ भन्ने दृष्टिकोण उजागर गर्यो।
कार्यक्रममा विद्यार्थीहरूले सांस्कृतिक प्रस्तुति समेत गरेका थिए, जसले कार्यक्रममा थप रौनकता ल्याएको थियो। देशभक्ति गीत र नृत्य मार्फत सहिदहरूको योगदानलाई स्मरण गरिनुका साथै नेपाली संस्कृति झल्काउने कार्यक्रमहरू प्रस्तुत गरिएका थिए।
कार्यक्रममा स्थानीय बुद्धिजीवी, विद्यार्थी, तथा विभिन्न क्षेत्रका प्रतिनिधिहरूको उत्साहजनक उपस्थिति रहेको थियो।
प्रतिक्रिया दिनुहोस