काठमाडौँ, फागुन २ – ठमेलमा ड्युटीमा रहेका प्रहरीमाथि कुटपिट गर्ने अनेरास्ववियुका स्थायी समिति सदस्य कमल जोशीलाई थप ८ दिन हिरासतमा राखेर अनुसन्धान गर्न जिल्ला प्रशासन कार्यालय काठमाडौँले अनुमति दिएको छ।
बिहीबार नयाँ बानेश्वरबाट पक्राउ परेका जोशीलाई अभद्र व्यवहारको कसुरमा अनुसन्धान गर्न काठमाडौँ प्रशासनले हिरासतको म्याद थप गरेको हो। जिल्ला प्रहरी परिसर काठमाडौँका एसपी अपिल बोहराका अनुसार जोशीलाई शुक्रबार म्याद थप गरेर अनुसन्धान अघि बढाइएको छ।
गत माघ २४ गते ठमेलको ज्याठास्थित छायाँ सेन्टर अगाडि ड्युटीमा खटिएका प्रहरी जवान नगेन्द्रराज विष्ट र हवल्दार जुगलाल घर्तीमाथि निर्घात कुटपिट भएको थियो। मध्यराति ‘राउण्ड अप ड्युटी’मा रहेका प्रहरीमाथि जोशीसहितको समूहले आक्रमण गरेको प्रहरी अनुसन्धानमा खुलेको छ।
यस घटनामा संलग्न डडेल्धुराको गन्यापधुरा–५ घर भएका २२ वर्षीय रमेश फुलारा र ताप्लेजुङ घर भएका २५ वर्षीय दिनेश सिग्देललाई यसअघि नै म्याद थप भइसकेको छ।
यस्तै, घटनामा संलग्न अनेरास्ववियुको अस्कल क्याम्पस कमिटी सचिव गोपाल बहादुर शाही, क्याम्पस कमिटी सदस्य नविन ऐर र शौजन्य शाही भने अझै फरार रहेको प्रहरीले जनाएको छ।
अञ्जना ढकाल
प्रतिक्रिया दिनुहोस