काठमाडौँ, चैत्र २० - शुक्रबार कोटेश्वरस्थित भाटभटेनी सुपरमार्केटमा राजावादी प्रदर्शनकारीको एक समूह लुटपाटमा संलग्न भएको छ।
सो क्रममा लुटपाट रोक्न बहादुरीका साथ प्रतिकार गरेका सुरक्षा गार्ड कृष्णप्रसाद पराजुलीलाई भाटभटेनी सुपरमार्केटले ५ लाख १ हजार १११ रुपैयाँसहित सम्मान गरेको छ।
बुधबार आयोजित एक कार्यक्रममा भाटभटेनीले अर्का एक सुरक्षा गार्डलाई ५१ हजार रुपैयाँसहित सम्मान गरेको छ भने सोही घटनाका क्रममा ड्युटीमा रहेका थप दुई सुरक्षाकर्मीलाई २५-२५ हजार रुपैयाँ प्रदान गरिएको छ।
भाटभटेनी सुपरमार्केटका अध्यक्ष मीन बहादुर गुरुङले पुरस्कार प्रदान गरेका थिए। सुपरमार्केटमा तोडफोड तथा लुटपाट भइरहेको बेला आफ्नो कर्तव्य निर्वाह गर्दै अग्रपंक्तिमा खटिएका सुरक्षाकर्मीहरूलाई सम्मान गरिएको सुपरमार्केटका सिइओ राजु पौडेलले जानकारी दिए।
लुटपाटको क्रममा सुरक्षा गार्ड पराजुलीले दर्जनौँ लुटेरा समूहमाथि लाठी प्रहार गर्दै प्रतिकार गरेको दृश्य सामाजिक सञ्जालमा भाइरल बनेको छ। उक्त घटनाका कारण भाटभटेनी सुपरमार्केटलाई करिब ८० लाख रुपैयाँ बराबरको क्षति पुगेको बताइएको छ, जसमा ६४ लाख ८८ हजार रुपैयाँ बराबरको सामान लुटिएको कम्पनीले जनाएको छ।
यद्यपि, घटनापछि पनि सुपरमार्केटले आफ्नो सेवा अवरुद्ध हुन नदिई शनिबार बिहानैदेखि पुनः सञ्चालनमा ल्याएको थियो। यसका लागि सरसफाइ तथा मर्मत सम्भारमा कर्मचारीहरू रातभर खटिएका थिए।
अञ्जना ढकाल
प्रतिक्रिया दिनुहोस