काठमाडौं, चैत्र ६ – समाजवादी मोर्चाले चैत १५ गते काठमाडौँमा एक लाख जनतासहित प्रदर्शन गर्ने घोषणा गरेको दिन नै राजावादीहरूले खुकुरी बोकेर प्रदर्शन गर्ने भएका छन्।
बुधबार बिहान पत्रकार सम्मेलन गर्दै राजावादी अभियन्ता दुर्गा प्रसाईंले गणतन्त्रको अन्त्य नगरी नागरिकले सुख नपाउने दाबी गर्दै प्रदर्शनमा खुकुरीसहित उपस्थित हुन आह्वान गरेका छन्।
उनको यो भनाइसँगै समाजवादी मोर्चा र राजावादीबीच मुडभेडको खतरा बढेको छ। वर्तमान व्यवस्थाको विरोधमा अभियान चलाउँदै आएका प्रसाईंले राप्रपा अध्यक्ष राजेन्द्र लिङ्देन र वरिष्ठ नेता कमल थापामाथि कटाक्ष गर्दै राजाको नाममा ठूलो राजनीति गरिरहेको आरोप लगाए।
प्रसाईंले भने, "हिजो हामीले राष्ट्रवादी शक्तिहरूसँग धेरै अनुनय विनय गर्यौँ। राजा र हिन्दु राष्ट्रको पक्षमा उभिएका कमल थापा, राजेन्द्र लिङ्देन, रवीन्द्र मिश्र र धवलशमशेरसँग पनि सहकार्यको प्रयास गर्यौँ। तर, उहाँहरू केवल ठूलो राजनीति गर्नमै व्यस्त रहनु भयो।"
उनले आफू राजाको भन्दा पनि जनताको नजिक रहने दाबी गर्दै राजा र जनताको आँखाबाट आँसु झर्न नदिने प्रतिबद्धता व्यक्त गरे।
अञ्जना ढकाल
प्रतिक्रिया दिनुहोस