काठमाडौँ, चैत्र ११ - २०४६ सालको राजनीतिक परिवर्तनपछि सूर्यबहादुर थापा र लोकेन्द्रबहादुर चन्दले मिलेर राष्ट्रिय प्रजातन्त्र पार्टी (राप्रपा) गठन गरे। संवैधानिक राजतन्त्र, बहुदलीय प्रजातन्त्र र उदार अर्थतन्त्रको सिद्धान्तमा आधारित यो पार्टी जन्मिँदै विभाजित भयो।
२०६२/०६३ को जनआन्दोलनपछि राजतन्त्र समाप्त भए पनि राप्रपामा फुट र एकताको शृङ्खला रोकिएन। २०४८ देखि हालसम्म यो पार्टी ६ पटकभन्दा बढी विभाजन भइसकेको छ।
पार्टी नेतृत्व र रणनीतिका विषयमा विवाद बढेपछि हालैको भेलाले नवराज सुवेदीलाई संयुक्त आन्दोलनको संयोजक बनाएको छ। तर, अध्यक्ष राजेन्द्र लिङ्देन नेतृत्वमै आन्दोलन लैजानुपर्ने अडानमा छन्। महामन्त्री धवल शमशेर राणा सुवेदीको समर्थनमा छन् भने पशुपति शमशेर राणा, डा. प्रकाशचन्द्र लोहनी लगायत नेताहरू असन्तुष्ट देखिन्छन्।
राप्रपाको इतिहास हेर्दा सत्ता समीकरणका कारण पटक–पटक फुटेको देखिन्छ। २०५१ मा २० सिट जितेपछि सरकारमा सहभागी हुने विषयमा मतभेद हुँदा पहिलो विभाजन भयो।
२०५९ मा राजा ज्ञानेन्द्रको कदमपछि कमल थापाले राप्रपा नेपाल गठन गरे। २०७० मा राप्रपा र राष्ट्रिय जनशक्ति पार्टीबीच एकता भयो, तर कमल थापाले २०७८ मा फेरि पार्टी विभाजन गरे।
गणतन्त्रपछि पनि राप्रपा पटक–पटक सरकारमा सहभागी हुँदै आएको छ। हालै अध्यक्ष लिङ्देन उपप्रधानमन्त्री तथा ऊर्जा मन्त्री बनेका थिए। पार्टीभित्र पुनः फुटको सम्भावना बढ्दै गइरहेको देखिन्छ।
अञ्जना ढकाल
प्रतिक्रिया दिनुहोस