काठमाडौं, चैत्र १५ — राजसंस्था पुनर्स्थापनाका लागि दुर्गा प्रसाईं नेतृत्वमा भएको प्रदर्शनका क्रममा काठमाडौंको तीनकुनेस्थित एक घरमा आगलागी हुँदा भिडिओ खिचिरहेका पत्रकारको मृत्यु भएको छ।
एभिन्युज टेलिभिजनका अनुसार भिडिओ पत्रकार सुरेश रजकको आगलागीमा परेर ज्यान गएको हो। एभिन्युज टेलिभिजनले लाइभ प्रसारणमै आफ्ना पत्रकारको मृत्यु भएको जानकारी दिएको छ।
नेपाल प्रहरी केन्द्रीय प्रवक्ता डिआइजी दिनेशकुमार आचार्यले आगलागी भएको घरको चौथो तलामा जलेको अवस्थामा एक जनाको शव फेला परेको पुष्टि गरेका छन्।
"जलेको अवस्थामा एक जनाको शव फेला परेको छ, तर सनाखत भइसकेको छैन," प्रवक्ता आचार्यले भने।
एभिन्युज टेलिभिजनका एक पत्रकारका अनुसार सुरेश रजक उक्त घरमा भिडिओ खिच्दै थिए। "उहाँको जलेर मृत्यु भएको भन्ने छ, प्रहरीले टेलिभिजनका प्रमुखलाई बोलाएको छ, उहाँ जानुभएको छ," ती पत्रकारले जानकारी दिए।
प्रहरीले घटनाबारे अनुसन्धान गरिरहेको जनाएको छ।
अञ्जना ढकाल
प्रतिक्रिया दिनुहोस