काठमाडौं, चैत १८ – प्रधानमन्त्री केपी शर्मा ओलीले चैत १५ गते राजधानीमा भएको समाजवादी मोर्चाको प्रदर्शन शान्तिपूर्ण र सभ्य रहेको बताएका छन्।
संसदको प्रतिनिधि सभा बैठकलाई सोमबार सम्बोधन गर्दै प्रधानमन्त्री ओलीले प्रदर्शन सफल रूपमा सम्पन्न भएकामा आयोजकहरूलाई धन्यवाद दिएका हुन्। उनले भने, "शालिन जुलुससहित भएको त्यस कार्यक्रममा आयोजकहरूलाई धन्यवाद ज्ञापन गर्दछु। हाम्रो संघीय लोकतान्त्रिक गणतन्त्रलाई सुदृढ गर्ने विधि यस्तै हो भन्ने म ठान्छु।"
उनले समाजवादी मोर्चाले गरेको प्रदर्शन भव्य र अनुशासित रहेको भन्दै प्रशंसा गरे। "यस सम्मानित सदनमा राम्रो उपस्थिति रहेका दलहरूको मूल नेतृत्वमा समाजवादी मोर्चाले काठमाडौंको प्रदर्शनमार्गीमा भव्य सभा गर्यो। आफ्नो धारणा सार्वजनिक गर्यो, सरकारलाई खबरदारी गर्यो। संविधान र व्यवस्थाप्रति आफ्नो प्रतिबद्धता जनायो," उनले भने।
प्रधानमन्त्री ओलीले संविधानले प्रदान गरेको विरोध र आलोचनाको अधिकारलाई सरकारले सम्मान गर्ने बताए। "शान्ति सुव्यवस्था कायम राख्दै विरोध गर्न पाइन्छ, आलोचना गर्न पाइन्छ। संवैधानिक अधिकारको सम्मान गरिनुपर्छ," उनले थपे।
चैत १५ गते समाजवादी मोर्चाले काठमाडौंमा प्रदर्शन गरेको थियो। उक्त मोर्चामा नेकपा माओवादी केन्द्र, नेकपा एकीकृत समाजवादी, महिन्द्र राय यादव नेतृत्वको नेपाल समाजवादी पार्टी र नेत्र विक्रम चन्द नेतृत्वको नेपाल कम्युनिस्ट पार्टी सहभागी थिए।
प्रधानमन्त्री ओलीले समाजवादी मोर्चाको प्रदर्शनलाई शालिन भने पनि सोही दिन तिनकुनेमा भएको राजावादीहरूको प्रदर्शनलाई भने उनले उत्तेजक रहेको भन्दै आलोचना गरे।
अञ्जना ढकाल
प्रतिक्रिया दिनुहोस