कृष्णपुर नगरपालिका १ पहरिया स्थित राष्ट्रिय माध्यमिक विद्यालयको शैक्षिक गुणस्तर सुधार गर्ने विषयमा छलफल भएको छ । विद्यालय व्यवस्थापन समिति र शिक्षकहरु विच शैक्षिक गुणस्तर सुधारका विषयमा शुक्रवार छलफल भएको हो ।
छलफलमा आगामी दिनमा विद्यालयको शैक्षिक गुणस्तर सुधार गर्दै लैजाने प्रतिवद्धता व्यक्त गरिएको छ । विद्यालयको शैक्षिक स्तर कसरी स्तरीय बनाउन सकिन्छ ? आजको संसारमा विद्यालयको जनशक्ति कसरी व्यवस्थापन हुन सक्छ ? समाज रुपान्तरणका लागि शैक्षिक संस्थाको दायित्व के हो ? लगायत विषयमा विद्यालय व्यवस्थापन समिति र शिक्षकहरुविच व्यापक छलफल भएको विद्यालय व्यवस्थापन समिति अध्यक्ष कमल क्षेत्रीले बताए ।
शैक्षिक गुणस्तर सुधारका विषयमा बोल्दै विद्यालय व्यवस्थापन समति अध्यक्ष क्षेत्रीले शिक्षकहरुले दायित्वबोध नगर्दा विद्यालयको शैक्षिक गुणस्तर खस्किएको बताए । “शिक्षकहरुले दायित्वबोध गर्न सकेनन्,अध्यक्ष क्षेत्रीले भने,खाली शिक्षकहरु विद्यालयमा आएर समय मात्रै व्यतित गरिएको जस्तो देखियो” । पछिल्लो समय सामुदायिक विद्यालयहरुप्रति जनताको मोह भंग भएको उनको भनाई छ । “सामुदायिक विद्यालयहरुप्रति जनताको वितृष्णा छ,राज्यले सामुदायिक विद्यालयहरुमा करोडौँ लगानी गरेको छ,तर पनि किन सामुदायिक विद्यालयहरुको शैक्षिक गुणस्तर खस्किदो अवस्थामा छ ? यो राष्ट्रिय माध्यमिक विद्यालय पहरियाको मात्र समस्या होइन,अध्यक्ष क्षेत्रीले भने,मुलुककै समस्या हो,यसबारे विस्तृतमा समिक्षा गर्नु आवश्यक छ” ।
सामुदायिक विद्यालयहरुमा राज्यले लगानी गरेजत्तिको प्रतिफल प्राप्त नहुनुमा मुख्यत: शिक्षककै कमजोरी देखिएको उनले औँल्याए । शिक्षक आफ्नो कामबाट पन्छिन नहुनेमा उनले जोड दिए । यद्यपी शैक्षिक गुणस्तर खस्किनुमा सरोकारवाल सवैको कमजोरी रहेको अध्यक्ष क्षेत्रीले बताए । सवैले आ-आफ्नो कमीकमजोरी औँल्याउँदै आगामी दिनहरुमा सुदृढ भएर जानुको विकल्प नरहेको विद्यालय व्यवस्थापन समितिका अध्यक्ष क्षेत्रीले बताए ।
यस्तै विद्यालयका प्रधानाध्यापक गणेश बहादुर चन्दले खस्किएकोे शैक्षिक गुणस्तरलाई सुधार गर्नका लागि सबै कटिबद्ध भएर लाग्नुपर्ने बताए । शैक्षिक गुणस्तर सुधारकै लागि आफ्नो संयोजकत्वमा १३ सदस्यीय कार्ययोजना समिति गठन गरिएको प्रधानाध्यापक चन्दले जानकारी दिए । विद्यालयका लेखापाल हुकुम बोहराले शैक्षिक गुणस्तर सुधार गर्नका लागि बैठक बसेको बताउँदै सबैले आ-आफ्ना कमीकमजोरी औँल्याउँदै अघि बढ्नुपर्नेमा जोड दिइएको जानकारी दिए । वि.सं.२०३० सालमा स्थापना भएको विद्यालयमा हाल ६ सय १३ जना विद्यार्थी अध्यापनरत छन् ।
केदार अधिकारी
प्रतिक्रिया दिनुहोस