करोडौँ खर्चेर बनेको अस्पताल भवन दुई वर्षदेखि प्रयोगविहीन

अञ्जना ढकाल

७ दिन अघि

पाठक संख्या ५४

म्याग्दी, जेठ १ — अन्नपूर्ण गाउँपालिका–१, दोबामा पाँच करोडभन्दा बढी खर्चेर बनेको अस्पताल भवन दुई वर्षदेखि प्रयोगविहीन छ।

संघीय सरकारले सञ्चालन गर्ने भनिएको पाँच श्ययाको अस्पताल भवन आवश्यक जनशक्ति, उपकरण र सडकको अभावका कारण सञ्चालनमा आउन सकेको छैन।

वडाध्यक्ष दिलीप गर्बुजाका अनुसार अस्पतालका लागि अन्य वडामा जग्गा नपाएपछि दोबामा निर्माण गरिएको हो। "सडक स्तरोन्नतिका लागि संघीय र प्रदेश सरकारसँग पहल भइरहेको छ," उनले बताए।

भवनमा आकस्मिक सेवा, प्रयोगशाला, औषधी भण्डारसहित ३५ वटा कोठा छन्। अस्पतालका लागि १२ रोपनी जग्गा स्थानीयले निःशुल्क दिएका थिए।

तर, उपकरण, फर्निचर र घेराबारको अभावमा अस्पताल अझै सञ्चालनमा आउन सकेको छैन।