रूपन्देही–३ मा कात्तिक १७ गते उपनिर्वाचन, निर्वाचन आयोगले सार्वजनिक गर्‍यो विस्तृत कार्यतालिका

अञ्जना ढकाल

१ महिना अघि

पाठक संख्या १०५

रूपन्देही, साउन ५ – प्रतिनिधि सभा निर्वाचन क्षेत्र नम्बर ३, रूपन्देहीमा कात्तिक १७ गते उपनिर्वाचन हुने भएको छ। निर्वाचन आयोगले सो निर्वाचनका लागि आवश्यक प्रक्रिया तथा समय तालिका सार्वजनिक गरेको छ।

निर्वाचन कार्यक्रमअनुसार उम्मेदवारले असोज २१ गते बिहान १० बजेदेखि बेलुका ५ बजेसम्म मनोनयन दर्ता गराउन सक्नेछन्। सोही दिन बेलुका ५ देखि ७ बजेसम्म प्रारम्भिक उम्मेदवार सूची प्रकाशित हुनेछ।

उम्मेदवारविरुद्ध उजुरी दर्ता गर्ने समय असोज २२ गते बिहान १० बजेदेखि दिउँसो ३ बजेसम्म रहनेछ। त्यसपछि उजुरीको छानबिन र निर्णय प्रक्रिया असोज २२ को दिउँसो ३ बजेदेखि असोज २३ गते बेलुका ५ बजेसम्म चल्नेछ। सो कार्य सम्पन्न भएपछि बेलुका ५ देखि ७ बजेसम्म पुनः अद्यावधिक उम्मेदवार सूची सार्वजनिक गरिनेछ।

नाम फिर्ता गर्ने म्याद असोज २४ गते बिहान १० देखि दिउँसो १ बजेसम्मको लागि निर्धारण गरिएको छ। त्यसपछिको दुई घण्टाभित्र, अर्थात् दिउँसो १ देखि ३ बजेसम्म अन्तिम उम्मेदवार नामावली प्रकाशित हुनेछ। सोही दिन बेलुका ३ बजेदेखि ६ बजेसम्म उम्मेदवारहरूलाई निर्वाचन चिन्ह प्रदान गरिनेछ।

निर्वाचन आयोगले मतदान कात्तिक १७ गते बिहान ७ बजेदेखि बेलुका ५ बजेसम्म सञ्चालन हुने जानकारी दिएको छ।

यसबाहेक, आयोगले समानुपातिक निर्वाचन प्रणालीअन्तर्गत सन् २०७९ को निर्वाचनमा प्रतिनिधि सभा वा प्रदेश सभाका लागि बन्दसूचीमा नाम समावेश भएका व्यक्ति उपनिर्वाचनमा उम्मेदवार बन्न नपाउने कानुनी प्रावधानबारे पनि स्पष्ट जानकारी गराएको छ।

प्रचारप्रसार निषेध अवधि मतदान हुनु ४८ घण्टा अघिदेखि, अर्थात् कात्तिक १४ गते राति १२ बजेदेखि लागू हुनेछ। मतदान सम्पन्न भएपछि सबै मतपेटिका निर्वाचन अधिकृतको कार्यालयमा पुगी सकेपछि मात्रै मतगणना कार्य सुरु गरिनेछ।

निर्वाचन आयोगले सबै सरोकारवाला पक्षहरूलाई समयतालिका अनुसार आआफ्ना तयारी गर्न आग्रह गरेको छ।