रोल्पा जिप दुर्घटना : एकै परिवारका ७ सहित २० जनाको मृत्यु

अञ्जना ढकाल

५ घण्टा अघि

पाठक संख्या २९

रोल्पा, वैशाख १८ - रोल्पाको थवाङ गाउँपालिका–१ जलजला क्षेत्रमा भएको जिप दुर्घटनामा २० जनाको ज्यान गएको छ। मृतकमध्ये ७ जना एउटै परिवारका सदस्य रहेको खुलेको छ।

रुकुम पूर्वको सिस्ने गाउँपालिका–५ टाकुराका एकै परिवारका दुई दाजुभाइका ७ जनाले घटनास्थलमै ज्यान गुमाएको वडाध्यक्ष बिरेन्द्र बस्नेतले जानकारी दिएका छन्। उनका अनुसार दाजुको परिवारका ४ जना र भाइको परिवारका ३ जना दुर्घटनामा परेका हुन्।

दुर्घटनामा ज्यान गुमाउनेमध्ये ९ जना सिस्ने–५ टाकुराका, एक जना भूमे गाउँपालिका–५ का तथा अन्य दाङका रहेका बताइएको छ। मृतकहरूको पहिचान गर्ने काम जारी रहेको छ।

बिहीबार दिउँसो रुकुम पूर्वबाट थवाङतर्फ जाँदै गरेको लु १ ज ४१६७ नम्बरको बोलेरो जिप करिब ८ सय मिटर तल खस्दा दुर्घटना भएको हो। पानी परेका कारण र रात परिसकेपछि उद्धार कार्य रोकिएको थियो।

शुक्रबार बिहान सुरक्षाकर्मीको सहयोगमा उद्धार कार्य पुनः सुरु गरी शवहरू संकलन गरेर थवाङतर्फ लगिँदैछ। दुर्घटनामा १२ महिला, ४ पुरुष र ४ बालकले ज्यान गुमाएका छन्।

घटनामा घाइते भएका ३२ वर्षीय समिर कामीलाई उपचारका लागि अस्पताल लगिएको छ।