गुन्डु बैठकमा ओलीको गम्भीर आरोप : ‘पार्टी फुटाउने खेल चलिरहेको छ’

अञ्जना ढकाल

२ घण्टा अघि

पाठक संख्या ३६

काठमाडौं, जेठ ३१ - नेकपा एमालेका अध्यक्ष तथा प्रधानमन्त्री केपी शर्मा ओलीले पार्टीभित्र देखिएको पछिल्लो गतिविधिप्रति असन्तुष्टि जनाउँदै उपाध्यक्ष विष्णुप्रसाद पौडेल र महासचिव शंकर पोखरेलले पार्टी विभाजनतर्फ उन्मुख गतिविधि गरिरहेको आशंका व्यक्त गरेका छन्।

शनिबार भक्तपुरको गुन्डुमा बागमती प्रदेशका नेताहरूसँगको छलफलमा ओलीले केही नेताहरू विपक्षी शक्तिको योजनाअनुसार एमालेलाई कमजोर बनाउने प्रयासमा रहेको बताएका हुन्। स्रोतका अनुसार उनले विष्णु पौडेल र शंकर पोखरेलको नाम उल्लेख गर्दै उनीहरू पुनर्गठनको नाममा पार्टीलाई फुटतर्फ धकेल्न खोजिरहेको विश्लेषण गरेका थिए।

यसअघि बागमती प्रदेशमा आयोजित निर्वाचन समीक्षा तथा पार्टी पुनर्गठन सम्बन्धी सुझाव संकलन कार्यक्रममा अधिकांश नेताहरूले पार्टी पुनर्गठनको आवश्यकता औंल्याएका थिए। कार्यक्रममा बोल्दै उपाध्यक्ष पौडेलले एमालेको जनाधार र प्रतिष्ठा पुनःस्थापित गर्न संगठनात्मक पुनर्गठन अपरिहार्य रहेको धारणा राखेका थिए।

गुन्डुमा भएको छलफलका क्रममा केही नेताहरूले पौडेलको अभिव्यक्तिबारे ओलीको ध्यानाकर्षण गराएका थिए। त्यसक्रममा ओलीले पुनर्गठनको बहानामा पार्टीभित्र असन्तुष्टि बढाएर विभाजनको वातावरण सिर्जना गर्न खोजिएको आरोप लगाएको स्रोतको दाबी छ।

छलफलमा ओलीले पौडेल र पोखरेलप्रति असन्तुष्टि व्यक्त गर्दै आफूले विभिन्न विषयमा साथ खोज्दा अपेक्षित सहयोग नपाएको गुनासो समेत गरेका थिए। विशेषगरी आफूविरुद्ध भएका राजनीतिक र कानुनी घटनाक्रममा नेताहरूले सार्वजनिक रूपमा समर्थन नगरेको विषयमा उनले असन्तोष व्यक्त गरेको बताइएको छ।

उता, पार्टी पुनर्गठनको पक्षमा नेताहरूको बलियो समर्थन देखिएको दाबी गरिएको छ। कार्यक्रममा सहभागी अधिकांश नेताहरूले संगठनलाई नयाँ ढंगले अघि बढाउन पुनर्गठन आवश्यक रहेको धारणा राखेका थिए। केही नेताहरूले भने एमालेको एकता र नेतृत्व दुवै जोगाउनुपर्नेमा जोड दिएका थिए।

यसैबीच महासचिव शंकर पोखरेलले आइतबार सामाजिक सञ्जालमार्फत जनभावनाको सम्मान र जनसम्बन्ध सुदृढीकरणबाट मात्रै पार्टी बलियो बन्न सक्ने धारणा सार्वजनिक गरेका छन्। उनको उक्त अभिव्यक्तिलाई ओलीको पछिल्लो टिप्पणीप्रतिको अप्रत्यक्ष प्रतिक्रिया रूपमा हेरिएको छ।

एमालेभित्र पुनर्गठन र नेतृत्वको भूमिकाबारे बहस तीव्र बन्दै जाँदा पार्टीको आगामी दिशा र आन्तरिक एकतामाथि चासो बढेको छ।