ट्रम्पको पुनरागमनपछि डलर बलियो, सेयर बजार चढ्यो, बिटक्वाइनले नयाँ उचाइ छोयो

Donald Trump

एजेन्सीको सहयोगमा

२ बर्ष अघि

पाठक संख्या २५२

डोनाल्ड ट्रम्पको राष्ट्रपति पुनरागमनको तयारीसँगै अमेरिकी अर्थतन्त्र र विश्व बजारमा नयाँ हलचल देखिएको छ। रिपब्लिकन उम्मेदवार ट्रम्पले डेमोक्र्याटिक उपराष्ट्रपति कमला ह्यारिसलाई पराजित गर्दै ह्वाइट हाउस पुनः कब्जा गर्दा, अमेरिकी डलरको मूल्य उच्च भएको छ, सेयर बजार उकालो लागेको छ, र बिटक्वाइनले नयाँ रेकर्ड बनाएको छ।

ट्रम्पको संभावित विजयको घोषणासँगै वाल स्ट्रिटमा सेयर फ्युचर्सहरू बढेका छन्। यसैबीच, युरोपका प्रमुख सेयर सूचकाङ्कहरूले बिहानको कारोबारमा मुनाफा देखाए पनि एसियाली बजार मिश्रित देखिएको छ। विशेषगरी, ट्रम्पले चीनबाट आयात हुने वस्तुमा थप कर लगाउन सक्ने अडानका कारण चिनियाँ सेयर बजारमा असर परेको छ।

स्विसक्वोट बैंकका वरिष्ठ विश्लेषक इपेक ओजकार्डेस्कायाले, “ट्रम्प ट्रेड पूर्ण गतिमा छ,” भन्दै ट्रम्पको जीतले अमेरिकी कर कटौतीमा व्यापक प्रभाव पार्ने धारणा व्यक्त गरेका छन्। यससँगै, अमेरिकी फेडरल रिजर्भले बिहीबार आउने दर घोषणा र डिसेम्बरमा थप ब्याजदर समीक्षामा परिवर्तन ल्याउनसक्ने संकेत दिएको छ।

बिटक्वाइनको मूल्य ७५ हजार डलर नाघ्दै नयाँ कीर्तिमान बनाएको छ। ट्रम्पले अमेरिका क्रिप्टोकरेन्सीको ‘विश्व राजधानी’ बनाउने योजना घोषणा गरेसँगै बिटक्वाइनको बजारमा उल्लेखनीय वृद्धि भएको हो। उनले प्रमुख टेक अर्बपति एलन मस्कलाई ‘स्टार’ भन्दै प्रशंसा गरेपछि, टेस्लाको सेयर पनि पूर्व-बजार कारोबारमा १५ प्रतिशतले बढेको छ।

तेलको मूल्यमा गिरावट देखिएको छ भने अमेरिकी ऊर्जा उद्योगमा स्वतन्त्रता कायम गर्ने ट्रम्पको अडानले कच्चा तेलको उत्पादनमा वृद्धि हुने संकेत दिएको छ। ट्रम्पको नेतृत्वले ऊर्जा क्षेत्रमा जीवाश्म इन्धनलाई प्राथमिकता दिने र ठूला उद्योगहरूको नियमनमा खुकुलोपन ल्याउने अपेक्षा गरिएको छ।

अमेरिकी अर्थतन्त्र र अन्तर्राष्ट्रिय वित्तीय बजारमा उल्लेखनीय प्रभाव ल्याउने ट्रम्पको पुनरागमनको आर्थिक नीतिहरू र अन्तर्राष्ट्रिय व्यापार सम्बन्धमा के कस्तो असर पर्छ भन्ने बिषयमा अबको केही महिनामा थप प्रस्टता आउनेछ।