सरकारले भिजिट भिसाको दुरुपयोग गरेर विदेशमा श्रमिक पठाउने क्रम रोक्न थप कडाइ गर्ने तयारी थालेको छ। अध्यागमन विभागले हालै त्रिभुवन अन्तर्राष्ट्रिय विमानस्थलबाट कुवेत उड्न लागेका २२ महिलालाई घर फर्काएको छ।
गत वर्ष सरकारले भिजिट भिसामा जान केही सहज व्यवस्था गरेको भए पनि अवैध रूपमा श्रमिक लैजाने क्रम बढेकाले फेरि कडाइ गर्न थालिएको हो। विशेष गरी खाडी देशहरू, क्रोएसिया र पश्चिम युरोपेली देशहरूमा रोजगारीका लागि भिजिट भिसामा जानेहरूको संख्या उच्च देखिएको छ।
भिजिट भिसामा विदेश जान खोज्नेहरूमाथि अध्यागमन कार्यालयले गन्तव्य र यात्राको उद्देश्यबारे सोधपुछ गर्दै आएको छ। भिजिट भिसाको नाममा श्रम गर्न जान लागेको पुष्टि भएमा उनीहरूलाई फर्काउने गरिएको छ।
श्रम, रोजगार तथा सामाजिक सुरक्षा मन्त्रालयले भिजिट भिसाको दुरुपयोग रोक्न अध्ययन समिति गठन गरेको छ। सहसचिव जीवलाल भुसालको नेतृत्वमा रहेको यो समितिले चाँडै प्रतिवेदन तयार गरी अवैध रूपमा श्रमिक लैजाने क्रम रोक्न कदम चाल्नेछ।
भिजिट भिसाको नाममा रोजगारीको प्रलोभनमा परेर नेपालीहरू ठगीमा पर्ने गरेका छन्। विशेष गरी यूएई, कुवेत, र बहराइनमा यस्तो समस्या गम्भीर छ। मानव तस्करहरूले भिजिट भिसालाई 'वर्किङ भिसा' मा बदल्ने आश्वासन दिएर ठगी गर्ने गरेको छ।
सरकारले भिजिट भिसामा विदेश जान आवश्यक कागजात र प्रक्रिया कडा पार्दैछ। जाने र आउने टिकट, भ्रमण अवधिको खर्चको प्रमाण, र स्वघोषणा फारम अनिवार्य गरिएको छ। साथै, खाडी देशहरूमा जानेहरूको लागि थप निगरानी बढाउने योजना छ।
मानवअधिकारवादी संस्थाहरूले भिजिट भिसामा जानेमाथि कडाइ नगर्न सरकारलाई दबाब दिँदै आएका छन्। तर, वैदेशिक रोजगार व्यवसायीहरूले भने मानव तस्करी रोक्न सरकारले प्रभावकारी कदम चाल्नुपर्ने माग गरेका छन्।
सरकारले भिजिट भिसाको नाममा भइरहेको अवैध गतिविधि रोक्न कडा नीतिगत उपायहरू लागू गर्ने तयारी गरेको छ।
अञ्जना ढकाल
प्रतिक्रिया दिनुहोस