पुनः म्याद थपको लागि लामिछानेलाई अदालतमा उपस्थित गराइँदै

Rabi Lamichhane

अञ्जना ढकाल

२ बर्ष अघि

पाठक संख्या १२२

पोखरा — सहकारी ठगी आरोपमा पक्राउ परेका राष्ट्रिय स्वतन्त्र पार्टीका सभापति रवि लामिछानेलाई म्याद थपका लागि आज कास्की जिल्ला अदालतमा उपस्थित गराइँदै छ। मंसिर ८ गतेदेखि लागू भएको १५ दिनको म्याद शनिबार सकिएपछि पुनः म्याद थप गर्न प्रहरी तयारीमा छ।

सूर्यदर्शन सहकारीको रकम अपचलन मुद्दामा लामिछानेलाई गत कात्तिक २ गते पक्राउ गरिएको थियो। सहकारी ठगी, सम्पत्ति शुद्धीकरण र संगठित अपराधमा अनुसन्धान भइरहेको कास्की प्रहरीले जनाएको छ।

हिरासतमा रहेका लामिछानेलाई अनुसन्धानका लागि रुपन्देही, काठमाडौं, र चितवनमा बयानका लागि लगिएको थियो। उनलाई सुप्रिम सहकारी (बुटवल), स्वर्णलक्ष्मी सहकारी (काठमाडौं), सहारा सहकारी (चितवन), र सानो पाइला सहकारी (वीरगञ्ज) को रकम अपचलन गरेको आरोप छ।

यसअघि, अदालतले लामिछानेको म्याद पटक–पटक थप गरेको थियो। पहिलोपटक ६ दिन, दोस्रोपटक ७ दिन, तेस्रोपटक १० दिन, चौथोपटक १३ दिन, र पाँचौँपटक १५ दिनको म्याद थप गरिएको थियो। असोज ६ गतेलाई पहिलो दिन मान्दै म्याद गणना गरिएको अदालतले जनाएको छ।