काठमाडौं- काठमाडौं उपत्यकाभित्र ४८ हजार वर्गमिटरभन्दा बढी सडकका खाल्टाखुल्टी पुर्ने कार्य सम्पन्न भएको छ। चालु आर्थिक वर्ष २०८१/८२ मा कुल ७४ हजार वर्गमिटर सडक पुर्ने लक्ष्य लिएकोमा हालसम्म ५.७८ करोड रुपैयाँ खर्च भएको छ।
सडक विभागका अनुसार काठमाडौं, भक्तपुर, र ललितपुरका सडकमा खाल्टाखुल्टी पुर्ने काम तीव्र गतिमा भइरहेको छ।
काठमाडौं सडक डिभिजनले ३० हजार वर्गमिटरभन्दा बढी सडक पुर्दा ३.६ करोड रुपैयाँ खर्च गरेको छ। भक्तपुर र ललितपुरमा क्रमशः १.५ करोड र ६८ लाख रुपैयाँ खर्च भएको छ।
सडक विभागका इन्जिनियर शुभराज न्यौपानेका अनुसार खानेपानी, विद्युत् र महानगरले विभिन्न ठाउँमा सडक भत्काएकाले उपत्यकाका सडकलाई पूर्ण रूपमा खाल्टाखुल्टीरहित बनाउन चुनौती रहेको छ।
सडक मर्मतका लागि विभागले चालु आर्थिक वर्षमा ११.९ करोड रुपैयाँ बजेट विनियोजन गरेको छ।
अञ्जना ढकाल
प्रतिक्रिया दिनुहोस