काठमाडौं जिल्ला अदालतमा रवि लामिछानेको बयान सुरु

Rabi Lamichhane

अञ्जना ढकाल

२ बर्ष अघि

पाठक संख्या १४९

काठमाडौं, पुस २८ - राष्ट्रिय स्वतन्त्र पार्टी (रास्वपा) का सभापति रवि लामिछानेको बयान काठमाडौं जिल्ला अदालतमा न्यायाधीश माधवप्रसाद अधिकारीको इजलासमा सुरु भएको छ।

गत बिहीबार जिल्ला अदालत कास्कीका न्यायाधीश नितिजकुमार राईको इजलासले लामिछानेसहित ७ जनालाई धरौटीमा रिहा गर्न आदेश दिएको थियो।

धरौटीमा रिहा भएपछि लामिछानेलाई प्रहरीले काठमाडौं जिल्ला अदालतमा उपस्थित हुने सर्तमा परिवारको जिम्मा लगाएको थियो। सोहीअनुसार लामिछाने आज बिहान काठमाडौं जिल्ला अदालत उपस्थित भएका हुन्।

लामिछानेविरुद्ध काठमाडौंको स्वर्णलक्ष्मी सहकारी ठगीको अभियोगमा मुद्दा दर्ता भएको थियो। उक्त मुद्दाको बयानका लागि लामिछाने आज अदालतमा हाजिर भएका हुन्।

स्वर्णलक्ष्मीबाट गोर्खा मिडिया नेटवर्कमा कानुन विपरीत ५ करोड ७८ लाख ९८ हजार ४८० रुपैयाँ गएको प्रहरी अनुसन्धानले देखाएको छ। सरकारी वकिल कार्यालयले लामिछानेलाई सो रकम बिगो मागदाबी गर्दै मुद्दा दायर गरेको हो।