पाल्पा, माघ १५ - रामपुर नगरपालिकाले कक्षाकोठामा शिक्षण कार्यका लागि प्रयोग हुने शैक्षिक सामग्री निर्माण गर्न शिक्षकलाई तालिम दिन थालेको छ। दैनिक कक्षाकोठामा शैक्षिक प्रयोजनका लागि अनिवार्य रुपमा सामग्री प्रयोग गरिने भएकाले बाहिरबाट सामग्री खरिद गर्नुभन्दा शिक्षकलाई ज्ञान र सीप प्रदान गरी स्थानीय स्रोतसाधनको उपयोग गरेर सामग्री निर्माण गर्न नगरपालिकाले यो कार्यक्रम सुरु गरेको हो।
नगरपालिकाभित्रका ६० विद्यालयका शिक्षकलाई व्यावहारिक ज्ञान र सीप प्रदान गरिएको छ। यसमा प्राथमिक तहका ३० र आधारभूत तथा माध्यमिक तहका ३० शिक्षक सहभागी भएका छन्। नगर शिक्षा अधिकृत विकल काफ्लेका अनुसार स्थानीयस्तरमा उपलब्ध स्रोतसाधनको प्रयोग गरी थोरै समय र कम खर्चमा शैक्षिक सामग्री निर्माण गरी शिक्षणलाई सरल, रमाइलो र प्रभावकारी बनाउने सीप तालिममार्फत सिकाइएको छ।
नगर उपप्रमुख बालकुमारी थापाले शैक्षिक सुधार र विकासका लागि ‘बुक फ्रि फ्राइडे’ लगायतका कार्यक्रम सञ्चालन भइरहेको र कक्षाकोठामा प्रभावकारी शिक्षण सुनिश्चित गर्न स्थानीय सामग्रीको प्रयोग गरेर शैक्षिक सामग्री निर्माणलाई प्रोत्साहन गरिएको बताइन्।
तालिममा सहभागी शिक्षकलाई सामग्री निर्माण, यसको व्यवस्थापन, प्रयोग विधि, स्रोतसाधनको सङ्कलन र शैक्षिक सामग्रीको प्रस्तुतिकरणसम्बन्धी विभिन्न विषयमा जानकारी दिइएको छ। यस तालिमले शिक्षकको क्षमता विकास गर्दै शिक्षण कार्यलाई प्रभावकारी बनाउन मद्दत पुग्ने अपेक्षा नगरपालिकाले लिएको छ।
अञ्जना ढकाल
प्रतिक्रिया दिनुहोस