काठमाडौँ, माघ १६ – प्रधानमन्त्री केपी शर्मा ओलीले आफूले भ्रष्टाचार नगर्ने र थाहा पाएसम्म अरू कसैलाई पनि भ्रष्टाचार गर्न नदिने बताएका छन्।
बुधबार काठमाडौँमा आयोजित नेपाल बार एशोसिएशनको पहिलो युवा कानुन व्यवसायी सम्मेलनलाई सम्बोधन गर्दै प्रधानमन्त्री ओलीले भने, “भ्रष्टाचार कहाँ छ, कहाँ छैन भन्ने कुराले कतिलाई धक्का लाग्न सक्छ। तर अहिलेको सरकार र म भ्रष्टाचार गर्दिनँ, अरूलाई पनि थाहा पाएसम्म गर्न दिन्नँ। भए नियन्त्रण गर्छु।”
प्रधानमन्त्री ओलीले भ्रष्टाचार नियन्त्रणको प्रतिबद्धता केवल प्रचारबाजी नभएको उल्लेख गरे। उनले भने, “हिजो बिहान उठेर सामाजिक सञ्जाल हेर्दा हिन्दी भाषामा एउटा पोस्ट देखेँ, जसमा भनिएको थियो— प्रधानमन्त्री केपी ओलीकी पत्नि राधिका शाक्यको स्वीजरल्याण्डको बैंकमा ४१ करोड डलर छ। यस्तो सुन्दा रिस उठ्नुपर्ने हो, तर अब त रिस नै उठ्न छोड्यो।”
उनले कानुन निर्माण र संशोधन गर्दा कानुन व्यवसायीहरूको मागलाई पनि ध्यानमा राखिने उल्लेख गरे। संविधान परिवर्तन सम्भावित प्रक्रिया भएको उल्लेख गर्दै उनले संविधान नभएका देशमा नजिरहरू रहने र ती नजिरहरू समेत समयानुकूल संशोधन हुने बताए।
अञ्जना ढकाल
प्रतिक्रिया दिनुहोस