काठमाडौँ, माघ २१ - प्रधानमन्त्री केपी शर्मा ओलीले ज्ञान र प्रकाशकी प्रतीक देवी सरस्वतीप्रति श्रद्धा व्यक्त गर्दै वसन्तपञ्चमी तथा सरस्वती पूजाको अवसरमा शुभकामना दिएका छन्। उनले अज्ञान, उत्तेजना र दुष्कर्मको अन्धकार हटोस भनी कामना गर्दै देवी सरस्वतीलाई नमन गरेका हुन्।
प्रधानमन्त्री ओलीले सामाजिक सञ्जालमार्फत आफ्नो सन्देश दिँदै भनेका छन्, "आज वसन्तपञ्चमी, जसलाई हामी श्रीपञ्चमी पनि भन्छौँ। यस दिनलाई बालबालिकाले अक्षरारम्भ गर्ने विशेष दिनका रूपमा लिइन्छ। यो मौसममा बोटबिरुवामा नयाँ पालुवा पलाउन थाल्छ, चराहरू वसन्ती भाकामा गाउन थाल्छन्, र मानिसको मन पनि प्रमोदित हुन्छ।"
उनले प्राचीन शास्त्रमा शब्दलाई ब्रह्म, अक्षरलाई अनन्त र नादलाई यन्त्र मानिने उल्लेख गर्दै सरस्वतीको वीणाबाट उत्पन्न ध्वनिलाई नै ब्रह्माण्डको आवाज ओमकार ध्वनि मानिँदै आएको स्मरण गरेका छन्।
वसन्तपञ्चमी विशेष गरी ज्ञान, कला, साहित्य, र संगीतको देवी सरस्वतीको पूजा–आराधना गर्ने दिन हो। विद्यालय, कलेज, र अन्य शैक्षिक संस्थाहरूमा विशेष पूजा गरिन्छ। साथै, यो दिन बालबालिकाहरूलाई पहिलो अक्षर लेख्न सिकाउने परम्परा पनि छ।
वसन्त ऋतुको आगमनको संकेत दिने यस पर्वलाई विशेष गरी विद्यार्थी, कलाकार, लेखक तथा संगीतकर्मीहरूले श्रद्धा एवं उत्साहका साथ मनाउने गरेका छन्।
अञ्जना ढकाल
प्रतिक्रिया दिनुहोस