म्याग्दी, माघ २२ – नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले वर्तमान सरकारलाई असंवैधानिक भन्दै कडा आलोचना गरेका छन्।
मंगलबार म्याग्दीको बेनीमा आयोजित विरोध सभालाई सम्बोधन गर्दै प्रचण्डले सरकार संविधान विरोधी भएको जिकिर गरे। उनले नेपालको संविधानअनुसार संसद्मा ठूलो दलको नेताले सरकार गठन गर्नुपर्नेमा त्यसो नगरिएको आरोप लगाए।
"संविधानमा स्पष्ट लेखिएको छ कि धारा ७६(२) अन्तर्गत बनेको सरकारले विश्वासको मत नपाएमा ७६(३) अनुसार संसद्को सबैभन्दा ठूलो दलको नेतृत्वमा सरकार बन्नुपर्छ। तर, यहाँ फेरि ७६(२) अनुसार दोस्रो ठूलो पार्टीको नेतृत्वमा सरकार बनाइयो, जुन असंवैधानिक छ," प्रचण्डले भने।
उनले अहिलेको सरकार संविधान मिच्ने प्रवृत्तिको निरन्तरता भएको र लोकतन्त्र विरोधी रहेको दाबी गरे। "लोकतन्त्रमा पहिलो र दोस्रो दल मिलेर सरकार बनाउने प्रथा हुँदैन। भारतमा कांग्रेस र भाजपा कहिल्यै मिलेर सरकार बनाउँदैनन्, तर नेपालमा मिल्नै नमिल्ने तत्वहरू भ्रष्टाचारको संरक्षणका लागि जुटेका छन्," उनले थपे।
प्रचण्डले वर्तमान प्रधानमन्त्री तथा नेकपा एमालेका अध्यक्ष केपी शर्मा ओलीलाई जालीझेली, फटाहा र धोकेबाजको संज्ञा दिँदै कटाक्ष गरे।
"प्रधानमन्त्रीको कुर्सीमा बसेका एमाले अध्यक्षले ढाँट, छल, जालझेल गर्नुभयो। मसँगसमेत धोका दिनुभयो। उनले आफ्नै हस्ताक्षर भएको पत्रसमेत अस्वीकार गरे। यस्तो जालीझेली मान्छे प्रधानमन्त्री भएपछि देशले सुख पाउँछ त?" प्रचण्डले प्रश्न गरे।
उनले वर्तमान सरकार दलाल, बिचौलिया र कमिशनखोरहरूको मिलेमतोमा बनेको आरोप लगाए। "यो सरकार जनताले बनाएको होइन, दलालहरूले बनाएका हुन्। कांग्रेस-एमालेबीचको सहमति विनोद चौधरी र रामेश्वर थापाको घरमा राति बसेर भयो। यस्तो अप्राकृतिक सरकारले जनताको भलो गर्न सक्दैन," उनले भने।
प्रचण्डले वर्तमान गठबन्धनलाई अलोकतान्त्रिक भन्दै आम जनताले यसको विरुद्धमा आवाज उठाउनुपर्ने बताए।
अञ्जना ढकाल
प्रतिक्रिया दिनुहोस