एलिना चौहान र विष्णु सापकोटाबीच सम्बन्धविच्छेद, एलिनाले यस्तो भनिन्....

अञ्जना ढकाल

२ महिना अघि

पाठक संख्या १४४

काठमाडौँ, माघ २९ – गायिका एलिना चौहान र उनका श्रीमान् विष्णु सापकोटाबीच कानुनी रूपमा सम्बन्धविच्छेद भएको छ।

काठमाडौँ जिल्ला अदालतले मंगलबार उनीहरूबीचको सम्बन्धविच्छेद मुद्दामा टुंगो लगाएको हो। अदालतका सूचना अधिकारी दीपक कुमार श्रेष्ठका अनुसार न्यायाधीश मोना सिंहको इजलासले अंश र मानाचामल नलिने सर्तसहित सम्बन्धविच्छेदको फैसला गरेको छ।

सम्बन्धविच्छेदको फैसलापछि चौहानले सामाजिक सञ्जाल फेसबुकमार्फत आफ्नो भावनात्मक प्रतिक्रिया व्यक्त गरेकी छन्। उनले लेखेकी छन्, "फेरा, चुरा, सिन्दूर, लगनगाँठो, विवाह दर्ता र शारीरिक मिलन मात्रै विवाह होइन रहेछ।

भावनात्मक मिलन, आपसी विश्वास र समझदारी नै विवाहको मुख्य प्राण रहेछ। जुन रहेन अनि हाम्रो सम्बन्धमा अल्पायु मै पूर्णविराम लागेको छ।"

चौहानले आफ्नो फेसबुक स्टाटसमा वैवाहिक जीवनका अविस्मरणीय क्षणहरू स्मरण गर्दै विष्णुलाई शुभकामना दिएकी छन्।

उनले लेखेकी छन्, "प्रिय विष्णु, अग्निलाई साक्षी राखेर ७ फेरा लगाउँदा गलेका खुट्टाहरू अझै उस्तै छन्।तिम्रो हातले रंगिएको मेरो सिउँदो अनि सिन्दूरका डोबहरू अझै उस्तै छन्। तिम्रा नाममा लगाएका हातभरिका चुरा अझै उस्तै छन्। हामीलाई दुईबाट एक बनाएको सेतो लगनको गाँठो अझै उस्तै छ।"

तर, सम्बन्धविच्छेद रहरले नभई बाध्यताले भएको उनले उल्लेख गरेकी छन्। "जुन बाध्यता तिमी, मलाई र भगवानलाई मात्र थाहा छ," चौहानको भनाइ छ।

अब कानुनी रूपमा स्वतन्त्र भएसँगै आ–आफ्नो गन्तव्य तय गर्न बाटो खुलेको चौहानले जनाएकी छन्। उनले पत्नीका रूपमा पाउनुपर्ने सम्पत्ति समेत विष्णुको प्रगति र उन्नतिका लागि छोडेको बताएकी छन्।

सम्बन्धविच्छेदपछि पनि सौहार्दपूर्ण व्यवहार राख्दै विष्णुलाई जीवनको बाँकी यात्राका लागि शुभकामना दिँदै उनले लेखेकी छन्, "तिम्रो सुख, शान्ति र सफलताको लागि मेरो मन सधैं शुभेच्छुक रहनेछ।"