नवलपरासी, चैत ४ – करीब एघार महिनादेखि मलेसियामा रोकिएको नवलपरासी (बर्दघाट सुस्तापूर्व) की तिलमाया सार्कीको शव आज नेपाल ल्याइँदैछ। रोजगारीका लागि मलेसिया गएकी २५ वर्षीया तिलमायाको हत्या भएपछि शव ल्याउन परिवारले निरन्तर पहल गरे पनि प्रक्रिया लम्बिएको थियो।
गत वैशाख २९ गते एक पाकिस्तानी नागरिकद्वारा हत्या गरिएकी तिलमायाको शव प्राप्त गर्न उनका परिवारले लामो संघर्ष गर्नु परेको थियो। श्रीमानसँग सम्बन्धविच्छेद गरी छोरीको जिम्मेवारी आमालाई सुम्पेर मलेसिया गएकी तिलमायाको मृत्युले परिवारमा गहिरो पीडा छाएको छ।
शव नेपाल ल्याउन ७० वर्षीया आमा धनमाया सार्की विभिन्न निकाय धाइरहे पनि कानुनी प्रक्रिया तथा अनुसन्धान नसकिएको भन्दै मलेसियाबाट शव पठाउन ढिलाइ गरिएको थियो। सञ्चारमाध्यममा समाचार प्रकाशन भएपछि मात्र यो विषय प्राथमिकतामा परेको सुरक्षित आप्रवासन केन्द्र (सामी परियोजना) की परामर्शदाता रञ्जना लम्सालले जानकारी दिइन्।
लामो प्रयासपछि सोमबार दिनको साढे १२ बजे तिलमायाको शव बोकेको विमान त्रिभुवन अन्तर्राष्ट्रिय विमानस्थलमा अवतरण गर्नेछ। शव बुझ्न उनकी दिदी नीलमाया सार्की काठमाडौँ आइपुगेकी छन्। मलेसियन कम्पनीले शव ल्याउने सम्पूर्ण खर्च व्यहोर्ने भएको छ।
शव सोमबार साँझसम्म तिलमायाको माइतीघर नवलपरासीको कावासोती–४, हसौरामा आइपुग्नेछ। वैदेशिक रोजगार बोर्डको निःशुल्क शवबहानमार्फत काठमाडौँबाट शव घरसम्म पुर्याइने लम्सालले बताइन्।
शव नेपाल ल्याउन नसक्दा वृद्धा आमा र नाबालिका छोरी भावनात्मक रूपमा अत्यन्तै पीडित थिए। हत्या भएको खबर पाएदेखि नै आमा धनमाया वडा कार्यालयदेखि नगरपालिका हुँदै विभिन्न निकाय धाइरहेकी थिइन्।
मलेसियन दूतावासका अनुसार हत्याको अनुसन्धान नसकिएकाले शव नेपाल पठाउन ढिलाइ भएको हो। वैदेशिक रोजगार बोर्डको नियमानुसार मृत्यु भएको मितिले एक वर्षभित्र आर्थिक सहायता लिन निवेदन दिनुपर्ने प्रावधान छ। तिलमायाको परिवारले सहायताका लागि निवेदन दिइसकेको र आवश्यक बाँकी कागजात शवसँगै आउने भएकाले पछि बुझाइने जानकारी लम्सालले दिइन्।
अञ्जना ढकाल
-1579.jpeg)
प्रतिक्रिया दिनुहोस