२५ दिनदेखिको शैक्षिक आन्दोलन: विप्लवसँग शिक्षक प्रतिनिधि मण्डलको भेट

अञ्जना ढकाल

२ महिना अघि

पाठक संख्या ४१९

ललितपुर, वैशाख १३ - २५ दिनदेखि जारी शैक्षिक आन्दोलनमा सहभागी शिक्षक तथा कर्मचारीहरूको प्रतिनिधि मण्डलले आज नेकपाका महासचिव नेत्र विक्रम चन्द 'विप्लव' सँग भेटवार्ता गरेको छ।

भेटमा आन्दोलनरत प्रतिनिधि मण्डलले सरकारले विगतमा शिक्षक समुदायसँग गरेका माग र मुद्दालाई सम्बोधन गर्ने गरी विद्यालय, विद्यार्थी, शिक्षक तथा कर्मचारी मैत्री अग्रगामी शिक्षा ऐन जारी गर्न चासो नदेखाएको गुनासो गरेको छ। उनीहरूले सरकारको उदासीनताका कारण आन्दोलन लम्बिँदै गएको र समस्या थप जटिल बन्ने अवस्था आएको भन्दै चिन्ता व्यक्त गरे।

शिक्षक प्रतिनिधि मण्डलले समस्याको शीघ्र निकासका लागि राजनीतिक पहल गरिदिन महासचिव विप्लवलाई आग्रह गरेको छ। उनीहरूले शिक्षा क्षेत्रको वर्तमान संकट समाधान गर्न विप्लवको महत्त्वपूर्ण भूमिका रहने विश्वास व्यक्त गरे।

जवाफमा महासचिव विप्लवले शिक्षक तथा कर्मचारीका माग र समस्यालाई आफूले गम्भीर रूपमा लिएको बताएका छन्। उनले शिक्षा क्षेत्रको सुधारका लागि आफ्नो पार्टीले सक्दो सहयोग गर्ने प्रतिबद्धता व्यक्त गरेको बताइएको छ।

लामो समयदेखि जारी शैक्षिक आन्दोलनका कारण देशभरका विद्यालयहरूको पठनपाठन प्रभावित भएको छ। शिक्षकहरूले विभिन्न माग राख्दै आन्दोलन जारी राखेका छन् भने सरकारले यस विषयमा ठोस कदम चाल्न सकेको छैन।

यस्तो अवस्थामा आन्दोलनरत शिक्षकहरूको विप्लवसँगको भेटलाई अर्थपूर्ण रूपमा हेरिएको छ। यस भेटले आन्दोलनको निकासका लागि कस्तो भूमिका खेल्छ, त्यो भने हेर्न बाँकी छ।