ताप्लेजुङको होक्मा गाउँमा पहिरो, ६ घर परिवार विस्थापित

अञ्जना ढकाल

१ महिना अघि

पाठक संख्या १४५

ताप्लेजुङ, भदौ १६ – अविरल वर्षापछि ताप्लेजुङको सिरीजङ्घा गाउँपालिका–६ पेदाङस्थित होक्मा बस्ती पहिरोको उच्च जोखिममा परेको छ। गए राति आएको पहिरोले गाउँका ६ घर परिवारलाई विस्थापित हुन बाध्य बनाएको स्थानीयले बताएका छन्।

स्थानीयवासी खेलप्रसाद बुढाक्षेत्री परागका अनुसार हाङमाया थुङ्गिमको घरमा सबैभन्दा बढी खतरा देखिएको छ। साथै, जगत भण्डारी, भीमबहादुर भण्डारी, अम्बरध्वज लिम्बू, शिवलाल भण्डारी र टङ्क भण्डारीका घरसमेत पहिरोको जोखिममा परेका छन्।

चिचिहाङ बस्तीको तलबाट झरेको पहिरोले बस्तीमाथि निरन्तर दबाब सिर्जना गरेको छ। हाङमायाको परिवार राति नै छिमेकीको घरमा गएर बस्नुपरेको छ भने अन्य परिवार पनि सुरक्षित स्थानतर्फ सरेका छन्।

हाल वर्षा रोकिए पनि समय–समयमा पहिरो खसिरहेकाले गाउँका बासिन्दा त्रासमा रहेका छन्। स्थानीय प्रशासन र वडाले जोखिम मूल्याङ्कन गरी थप क्षति रोक्न पहल थाल्ने तयारी गरेको जनाइएको छ।