आफ्नै पार्टीकी उपसभामुखको भूमिकाप्रति हर्क साम्पाङ असन्तुष्ट

अञ्जना ढकाल

५ घण्टा अघि

पाठक संख्या ३६

काठमाडौँ, वैशाख २५ - श्रम संस्कृति पार्टीका अध्यक्ष तथा प्रतिनिधिसभा सदस्य हर्कराज राई ‘हर्क साम्पाङ’ले प्रधान न्यायाधीश नियुक्ति प्रक्रियामाथि गम्भीर असन्तुष्टि जनाएका छन् । शुक्रबार जारी प्रेस विज्ञप्तिमार्फत उनले सरकारले संवैधानिक प्रक्रिया र स्थापित पद्धति विपरीत निर्णय गरेको आरोप लगाएका हुन् ।

साम्पाङले संसद्लाई बेवास्ता गर्दै र राष्ट्र प्रमुखमाथि दबाब सिर्जना गरेर संवैधानिक परिषद् सम्बन्धी अध्यादेश ल्याइनु लोकतान्त्रिक मूल्यविपरीत भएको बताएका छन् । उनले वरियतामा चौथो स्थानमा रहेका व्यक्तिलाई प्रधान न्यायाधीशका लागि सिफारिस गर्नु गलत निर्णय भएको दाबी गरेका छन् ।

उनले विशेषगरी आफ्नै पार्टीबाट उपसभामुख बनेकी नेताको भूमिकाप्रति असन्तोष व्यक्त गरेका छन् । एमसीसी र एसपीपीजस्ता विषय उठाएर दबाबको वातावरण बनाइएको अवस्थामा उपसभामुखले समेत उक्त निर्णयमा हस्ताक्षर गर्नु दुःखद भएको उनको भनाइ छ ।

साम्पाङले नियुक्ति प्रक्रियामा राजनीतिक र कानुनी स्वार्थ लुकेको आशंका पनि व्यक्त गरेका छन् । सहकारी ठगी प्रकरण र ‘जेनजी’ आन्दोलनसँग सम्बन्धित मुद्दामा अनुकूल निर्णय गराउने उद्देश्यले सरकारले यस्तो कदम चालेको हुन सक्ने उनको आरोप छ ।