ब्रोड पिक दुर्घटना : निर्मल पुर्जासहित दिवंगत आरोहीको शव क्याम्प–१ झार्ने तयारी

अञ्जना ढकाल

१ हप्ता अघि

पाठक संख्या ८७

काठमाडौं, साउन १७ - पाकिस्तानको ब्रोड पिक हिमालमा गएको भीषण हिमपहिरोमा ज्यान गुमाएका नेपाली पर्वतारोही निर्मल पुर्जासहित अन्य दिवंगत आरोहीहरूको शव आइतबार क्याम्प–१ सम्म ल्याउने तयारी गरिएको छ।

उद्धारमा संलग्न ग्राउन्ड टिमका अनुसार शवहरूलाई पहिलो चरणमा क्याम्प–१ मा सुरक्षित रूपमा झारिनेछ। त्यसपछि सोमबार मौसमले साथ दिए जापानी क्याम्पसम्म पुर्‍याइने योजना बनाइएको छ। जापानी क्याम्पबाट हेलिकप्टर प्रयोग गरी शव तथा उद्धार टोलीलाई सुरक्षित स्थानमा स्थानान्तरण गर्ने तयारी पनि भइरहेको जनाइएको छ।

उद्धार टोलीले सबै दिवंगत आरोहीको शव सम्मानका साथ स्वदेश फर्काउने लक्ष्य राखेर अभियानलाई निरन्तर अघि बढाइरहेको जनाएको छ। हिमालको प्रतिकूल मौसम र जोखिमपूर्ण भू–भागका कारण उद्धार कार्य चुनौतीपूर्ण बने पनि टोलीले सावधानीपूर्वक अभियान सञ्चालन गरिरहेको छ।

गत १४ साउन ब्रोड पिक क्षेत्रमा आएको हिमपहिरोमा निर्मल पुर्जाको नेतृत्वमा रहेको टोलीका १० जना आरोही बेपत्ता भएका थिए। तीमध्ये ६ जना नेपाली थिए। निर्मल पुर्जाको निधन भएको पुष्टि शनिबार भएको थियो भने अन्य बेपत्ता आरोहीहरूको खोजी तथा उद्धार कार्य अझै जारी छ।