ललिता निवास प्रकरणबीच गच्छदार चुनावी प्रतिस्पर्धामा फर्किए, चुनाव लड्न तयार

अञ्जना ढकाल

७ महिना अघि

पाठक संख्या १३४

सुनसरी, मंसिर २५ - नेपाली कांग्रेसका वरिष्ठ नेता विजयकुमार गच्छदार फेरि सुनसरी–३ बाट प्रतिनिधिसभा चुनाव लड्न तयार भएका छन्। क्षेत्रीय समितिले उनलाई दुहबीका मेयर वेदनारायण गच्छदार र ओम थापासहित तीन नाममध्ये सिफारिस गरेको हो।

७१ वर्षीय गच्छदार २०४८ देखि सात पटक चुनाव लडेर छ पटक विजयी भएका छन्। २०७९ मा एमाले नेतृ भगवती चौधरीसँग उनी पहिलोपटक पराजित भएका थिए।

एकल नाम सिफारिस गराउने चाहना राखे पनि समितिले तीन जनाको नाम अघि सारेको कांग्रेस जिल्ला सचिव विरेन्द्र साहले बताए। सिफारिस भोलिको जिल्ला बैठकमा अन्तिम रूपमा दर्ता हुनेछ।

गच्छदारले १२ पटक मन्त्री भएर उपप्रधानसम्मको जिम्मेवारी सम्हालेका छन्। तर ललिता निवास जग्गा प्रकरणमा उनी विशेष अदालतमा चलिरहेको भ्रष्टाचार मुद्दामा अभियुक्त छन्। २०७८ मा १० लाख धरौटीमा रिहा भएका उनले आफू राजनीतिक प्रतिशोधको शिकार भएको बताउँदै आएका छन्।

यसैबीच, सुनसरीका अन्य क्षेत्रमा पनि विभिन्न नाम सिफारिस भएका छन्—सुनसरी–१ मा ८ जना, सुनसरी–२ मा ३ जना र सुनसरी–४ मा पूर्वमन्त्री ज्ञानेन्द्रबहादुर कार्कीसहित ५ जनाको सिफारिस भएको छ।