३ चैत, काठमाडौं - संघीय सत्ता समीकरण बदलिए सँगै प्रदेश सरकारहरु बदल्ने गृहकार्यमा नेताहरु जुटेका छन् । सत्ता साझेदार दलका शीर्ष नेताहरु प्रदेश नेतृत्वको भागबन्डा गर्ने छलफलमा जुटिरहँदा प्रदेश तहका नेताहरु नेतृत्व मनाउने जोडबलमा देखिन्छ ।
तर, लगातार सत्ता समीकरण बदलिरहँदा प्रदेश सरकार अस्थिर मात्रै नभएर कतिपय प्रदेशमा संवैधानिक अड्चन आउन सक्ने आँकलन समेत भइरहेको छ । त्यस्तै मध्येका एक हो, कोशी प्रदेश ।
एक वर्षमै पाँच वटा सरकार बदलिसकेको कोशीमा छैटौं सरकारको गृहकार्य सुरु भएको छ । पूर्वमुख्यमन्त्री एवं नेकपा एमाले कोशी प्रदेश संसदीय दलका नेता हिक्मत कार्की, यो तहको अस्थिरताका निम्ति जनतासँग माफी माग्नुको विकल्प नरहेको बताउँछन् ।
‘दुर्भाग्य र बाध्यतावस यो काम गरिरहेका छौ, हामी अब आफूलाई सच्याएर अगाडि बढ्ने र आगामी दिनहरुमा यस्ता काम नगर्न प्रतिबद्ध छौं भनेर माफी मागेर जानुपर्छ,’ उनी भन्छन्, ‘कमजोरीलाई धाकछोप त गर्न सकिंदैन नि ! गल्ती गरिरहेका छौं, त्यो गल्ती सच्याउँछौ भनेर बोल्नुपर्छ ।’
सिमोन भट्टराई
प्रतिक्रिया दिनुहोस