धनगढी - कैलालीको धनगढीमा अस्पताल खोल्ने भन्दै चर्च निर्माण गरिएको छ। धनगढी उपमहानगरपालिका–७ मनेहरामा छालाको अस्पताल खोल्ने भन्दै चर्च निर्माण गरिएको हो।
चर्चमै छन् दुई जना कोरियन
चर्च नजिकै घर भएका खगेन्द्रनाथ योगीले भवन निर्माण गर्दा कामदारलाई समेत कुनै कुरा बोल्न नदिएको बताएका छन्। उनले स्थानीयले चासो राख्दा कम्पनी निर्माण हुन लागेको मात्रै आफूहरूलाई बताइएको दाबी गरेका छन्। भवन निर्माणको काम दिनमा भन्दा रातिको समय गरिएको योगीले बताए।
पार्किङ क्षेत्र छोडेर साढे चार कट्ठामा बनेको दुई तले भवन निर्माणको काम असोजमा सुरू गरेर जेठमा सकेको र २०८१ बैशाख ६ गते ७ नम्बर वडा कार्यालयबाट सेमिनार र तालिम सञ्चालन गर्ने इजाजत लिएर असार १५ गतेबाट इसाई संगति लाग्न थालेको छ।
चर्चमा दुई जना दक्षिण कोरियाका नागरिक पनि धर्म प्रचार गर्न बसेको पाइएको छ। आफू १० वर्षदेखि नेपालमा बस्दै आएको तथा सहयोग गर्न चर्चमा बसेको ती कोरियन नागरिकले बताएका छन्। उनले चर्चमा सहयोग गर्न बसेको तर आफ्ना बारे थप कुरा सोध्न नपाउने बताएका छन्।
अर्को प्रयोजनमा जग्गा प्रयोग
लेट मेइन धनगढी प्रालि नामक इसाई एनजीओले जग्गा धनी भण्डारीबाट वार्षिक ३ लाख भाडा दिने समझदारीमा जग्गा लिजमा लिएर भवन निर्माण गरेको छ। लेट मेइनले मासिक २५ हजार भाडा तिरेर करोडौं लगानी गरेर भवन निर्माण गरी मासिक १५ हजार भाडामा चर्चलाई भवन प्रयोग गर्न दिएको पास्टर प्रशान्त राईले बताए।
१५ वर्षपछि भवनसमेत भण्डारीकै हुने सर्तमा जग्गा लिजमा लिएको लेट मेइनले छालाको अस्पताल नभएर सौन्दर्य सम्बन्धी क्लिनिक खोल्न भवन बनाएको र अहिले धनगढी मण्डलीलाई भवन प्रयोग गर्ने समझदारी भएको पास्टर राईको दाबी छ। कसैलाई कम्पनी कसैलाई छालाको अस्पताल स्थापना गर्ने भन्दै जनश्रमदानमा निर्माण गरिएको भवनमा नेपाल लाइफ वर्ड मिसनले धनगढी मण्डली नामक चर्चमा चहलपहल बढेपछि मात्रै स्थानीयले थाहा पाएका हुन्।
सोलुखुम्बु जिल्ला घर बताउने चर्चका पास्टर प्रशान्त राईले वडा कार्यालय, नगरपालिका, जिल्ला प्रशासन कार्यालयबाट इजाजत लिएर चर्च चलाएको बताएका छन्। तर इजाजत प्राप्त गरेको प्रमाण देखाउन भन्दा अर्को दिन देखाउने भन्दै पास्टर राई पन्छिए।
अस्पतालको लोगो दुरुपयोग
चर्चमा हरेक शनिवार संगति लाग्ने गरेको छ। चर्चभित्र भुइँ तलामा भान्सा कोठा, बाल संगति कोठा, आमा संगति कोठा र पुरूष संगति कोठाहरू निर्माण गरिएको छ। पहिलो तलामा प्रवचन कक्ष र कोरियन नागरिकको बस्ने कोठा निर्माण गरिएको छ।
चर्चमा १० वर्षदेखि इसाईमा लागेकोदेखि भर्खरै इसाई स्वीकार गरेका व्यक्तिहरू समेत भेटिएका थिए। चर्च परिसरमै प्रदेश ३–०१–०२२ च ५६९२ नम्बरको कार पार्किङ गरिएको थियो। कारको अगाडिको सिसामा अस्पताल जनाउने अङ्ग्रेजी ‘एच’ लेखिएको लोगो टाँसिएको छ। इसाईको प्रचारमा आएका कोरियनहरूलाई गाउँ लैजाँदा सो गाडीको प्रयोग हुने गरेको छ।
सिमोन भट्टराई
प्रतिक्रिया दिनुहोस