नेपाल चेम्बर एक्स्पो २०८१ : स्वदेशी उत्पादन प्रवर्द्धन र अन्तर्राष्ट्रिय व्यापार विस्तारको लक्ष्य

अञ्जना ढकाल

२ महिना अघि

पाठक संख्या ११५

काठमाडौं, माघ १८ - नेपाल चेम्बर अफ कमर्सले स्वदेशी उत्पादन प्रवर्द्धन, उद्योग विस्तार तथा अन्तर्राष्ट्रिय व्यापार सम्बन्ध सुदृढ गर्ने लक्ष्यसहित ‘नेपाल चेम्बर एक्स्पो २०८१’ आयोजना गरिरहेको छ।

हिजो अर्थात माघ १७ गते बुधबार यस एक्स्पोलाई हौसला प्रदान गर्न प्रधानमन्त्री केपी शर्मा ओली पनि त्यहाँ उपस्थित भएका थिए। उनले आफ्ना भनाइ राखेर विभिन्न स्टलमा राखिएको सामानहरूको अवलोकन पनि गरेका थिए। जसले विक्रेताहरु आफूलाई हौसला र आत्मबल मिलेको बताउँछन्। 

यस वर्षको एक्स्पोमा सूचना तथा प्रविधिलाई विशेष प्राथमिकता दिइएको छ। कार्यक्रमका सञ्चालक राष्ट्रभूषण चाकुबजुले "नेपालको आर्थिक तथा औद्योगिक विकासका लागि एक्स्पोले सकारात्मक योगदान गर्ने विश्वास लिएको" बताएका छन्। आयोजकका अनुसार, विदेशी प्रविधिसँगको सहकार्य तथा प्रतिस्पर्धाले नेपाली उद्योगलाई थप सशक्त बनाउन मद्दत गर्नेछ।

नेपाल चेम्बर अफ कमर्सका सदस्य तथा वन, कृषि तथा जडीबुटी समितिका सभापति कृष्णमान श्रेष्ठका अनुसार, एक्स्पोको मुख्य उद्देश्य राष्ट्रिय तथा अन्तर्राष्ट्रिय उत्पादनलाई उपभोक्तासम्म पुर्‍याउने सेतुको भूमिका खेल्नु हो। उनले भने, "नेपाल चेम्बर अफ कमर्स ८५औं वर्षमा प्रवेश गरेको छ। यस अवसरमा ८औं संस्करणको चेम्बर एक्स्पो आयोजना गर्न पाउँदा हामी गौरवान्वित छौं।"

५ दिनसम्म सञ्चालन हुने एक्स्पो बिहान १०:३० बजेबाट साँझ ५/६ बजेसम्म खुला रहने आयोजकले जनाएको छ। कृषिजन्य उत्पादनदेखि लिएर घरायसी तथा दैनिक उपभोग्य सामग्रीसम्म एक्स्पोमा प्रदर्शनी गरिनेछ।

नेपाल चेम्बर एक्स्पोमा १२५ भन्दा बढी स्टल रहने छन्, जसमा नेपाली उत्पादनलाई विशेष प्राथमिकता दिइएको छ। एक्स्पोमा कृषि, हस्तकला, टेक्सटाइल, सूचना प्रविधि, अटोमोबाइल तथा उपभोक्ता सामग्रीहरू प्रदर्शन गरिनेछ। साथै, बंगलादेश, भारत, चीन, दक्षिण कोरिया, मलेसिया, पाकिस्तानलगायतका देशका उत्पादनहरू पनि समावेश गरिनेछन्।

नेपाल चेम्बर अफ कमर्सका प्रतिनिधि चन्द्र थापाका अनुसार, "यो एक्स्पोले नेपाली उत्पादनलाई प्रवर्द्धन गर्दै व्यवसायलाई विस्तार गर्ने अवसर प्रदान गरेको छ। विभिन्न देशका उत्पादकहरू सहभागी भएकाले नेपाली उत्पादनलाई अन्तर्राष्ट्रिय बजारमा प्रवर्द्धन गर्न मद्दत पुग्नेछ।"

उदाहरणका लागि, कैलालीको मह उत्पादकले एक्स्पोमा स्टल राखेर आफ्नो उत्पादन प्रदर्शन गरिरहेका छन्। यसैगरी, देशभरका विभिन्न उत्पादकहरूले एक्स्पोमार्फत आफ्ना उत्पादनको पहिचान स्थापित गर्न अवसर पाएका छन्।

नेपाल चेम्बर अफ कमर्सले यसअघि पनि यस्ता एक्स्पोहरू आयोजना गर्दै आएको छ। यस्ता कार्यक्रमहरूले उत्पादक, व्यवसायी र उपभोक्ताबीचको सम्बन्ध सुदृढ पार्ने तथा नेपाली उत्पादनको माग बढाउने विश्वास गरिएको छ।

नेपाल चेम्बर एक्स्पो २०८१ मा सम्पूर्ण उद्यमी, व्यवसायी तथा उपभोक्तालाई सहभागिताका लागि आयोजकले आमन्त्रण गरेको छ।