चितवन, माघ २४ – राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्धको थुनछेक आदेश आजै आउने भएको छ।
चितवनको साहारा चितवन सहकारी ठगी प्रकरणमा दायर मुद्दामा लामिछानेविरुद्धको थुनछेक बहस बिहीबार सकिएको छ। चितवन जिल्ला अदालतमा न्यायाधीश दयाराम ढकालको इजलासमा बुधबार र बिहीबार दुई दिनसम्म बहस चलेको थियो। जवाफी बहससमेत टुंगिएपछि अदालतले आजै आदेश दिने तयारी गरेको हो।
साहारा चितवन सहकारीको ठगी प्रकरणमा बयान दिन लामिछाने बुधबार अदालतमा हाजिर भएका थिए। तर, थुनछेक बहस नसकिएपछि उनलाई बुधबार रातभर प्रहरीको जिम्मा लगाइएको थियो।
सरकारका तर्फबाट जिल्ला न्यायाधिवक्ताहरू रवि न्यौपाने, शम्भुकुमार बस्नेत, दशरथ पंगेनी, भोलानाथ निरौलासहित सहायक जिल्ला न्यायाधिवक्ताहरू बुद्धबहादुर थापा र अमृत सुवेदीले बहस गरेका छन्।
यस्तै, जाहेरवालाहरूको पक्षबाट वरिष्ठ अधिवक्ताहरू डा. सुरेन्द्र भण्डारी, दिनेश त्रिपाठी, राजकुमार श्रेष्ठ तथा अधिवक्ताहरू गोपिलाल देवकोटा, रमेश काफ्ले, रामचन्द्र आरसी गौतम र सुनिता अधिकारीले बहस गरेका थिए।
लामिछानेको पक्षबाट वरिष्ठ अधिवक्ताहरू सुशीलकुमार पन्त, जगन्नाथ पौडेल, धर्मराज आचार्य, सुरेन्द्रबहादुर थापा र अधिवक्ताहरू रामचन्द्र देवकोटा तथा डा. नारायणदत्त कंडेलले बहस गरे।
कास्की, काठमाडौं र रुपन्देहीमा लामिछानेविरुद्ध संगठित अपराधमा मुद्दा दर्ता भए पनि चितवनमा भने ठगी मुद्दामात्रै चलाइएको छ।
अब अदालतको आदेशपछि लामिछाने थुनामै रहने वा छुट्ने भन्नेटुंगो लाग्नेछ।
अञ्जना ढकाल
प्रतिक्रिया दिनुहोस