प्रमुख तीन दलको बैठक स्थगित

अञ्जना ढकाल

३ हप्ता अघि

पाठक संख्या ७८

काठमाडौं, असार ५ – नेपाली कांग्रेस, नेकपा एमाले र नेकपा माओवादी केन्द्रबीच बिहीबार बस्ने भनिएको शीर्ष तहको बैठक स्थगित भएको छ।

माओवादी केन्द्रका अध्यक्ष पुष्पकमल दाहाल ‘प्रचण्ड’ का प्रमुख स्वकीय सचिव गोविन्द आचार्यका अनुसार बैठक आपसी सहमतिमै स्थगित गरिएको हो। उनले भने, “आपसी सल्लाहमै बैठक स्थगित भयो। प्रधानमन्त्रीको कार्यालयबाट भोलि बसौंला भनेर खबर आएको छ। अब तत्काल बस्ने नबस्ने टुंगो छैन।”

प्रधानमन्त्री केपी शर्मा ओलीले संसद अवरोध, निजामती सेवा विधेयकलगायतका विषयमा छलफल गर्नका लागि बुधबार नै प्रमुख तीन दलका नेताहरूलाई बैठकका लागि बोलाएका थिए। तर, माओवादी अध्यक्ष प्रचण्ड चितवनमै रहेका कारण कांग्रेस सभापति शेरबहादुर देउवा र एमाले अध्यक्ष केपी ओलीबीच मात्र छलफल भएको थियो।

यसअघि संसद् बैठक लगातार अवरोधमा परिरहेको अवस्थामा प्रमुख दलहरूबीच सहमति खोज्न बैठकको तयारी गरिएको थियो। तर, मुख्य तीन दलबीच औपचारिक त्रिपक्षीय छलफल नहुँदा राजनीतिक सहकार्यको पहल केही समयका लागि पछि धकेलिएको देखिएको छ।