प्रधानमन्त्री नआएपछि गगनको कटाक्ष– देशभन्दा माथि कोही हुँदैन

अञ्जना ढकाल

२ हप्ता अघि

पाठक संख्या ६१

काठमाडौं, साउन १३ - समसामयिक राष्ट्रिय विषयमा छलफल गर्न बोलाइएको सर्वदलीय बैठकमा प्रधानमन्त्री बालेन शाह अनुपस्थित भएपछि नेपाली कांग्रेसका सभापति गगन थापाले असन्तुष्टि व्यक्त गरेका छन्।

बुधबार बिहान सम्पन्न बैठकपछि सञ्चारकर्मीसँग प्रतिक्रिया दिँदै थापाले देश चुनौतीपूर्ण परिस्थितिबाट गुज्रिरहेका बेला सरकारले सबै राजनीतिक दललाई विश्वासमा लिएर अघि बढ्नुपर्ने धारणा राखे। उनले कांग्रेसको उद्देश्य सरकारलाई असहज बनाउने नभई आवश्यक विषयमा सहकार्य गर्दै राष्ट्रिय हितमा काम गर्ने रहेको स्पष्ट पारे।

उनले प्रधानमन्त्रीको भूमिकाप्रति संकेत गर्दै अहिलेको अवस्थामा व्यक्तिगत दूरी वा अहंकार देखाउनेभन्दा सबै पक्षलाई समेटेर नेतृत्व गर्नुपर्ने बताए। प्रधानमन्त्रीले राष्ट्रिय एकता र आपसी सहकार्यलाई प्राथमिकता दिनुपर्ने उनको भनाइ थियो।

थापाले धार्मिक सद्भाव र सामाजिक सहिष्णुता कायम राख्न सबै राजनीतिक दलले जिम्मेवार व्यवहार गर्नुपर्ने आवश्यकता औँल्याए। नेपाली कांग्रेस पनि त्यसका लागि आफ्नो दायित्व पूरा गर्न प्रतिबद्ध रहेको उनले बताए।

उनले विगतमा मुलुक संकटमा पर्दा राजनीतिक मतभेदका बाबजुद पनि प्रधानमन्त्री र प्रमुख दलहरू एउटै टेबलमा बसेर समाधान खोज्ने परम्परा रहेको स्मरण गराउँदै अहिले पनि त्यही अभ्यास आवश्यक रहेको उल्लेख गरे।

सुनसरी घटनासहित पछिल्ला समसामयिक विषयमा साझा धारणा बनाउन राष्ट्रिय स्वतन्त्र पार्टीका सभापति रवि लामिछानेको पहलमा सर्वदलीय बैठक आयोजना गरिएको थियो। बैठकमा प्रधानमन्त्री बालेन शाह र गृहमन्त्री सुदन गुरुङ भने सहभागी भएनन्।