फ्रान्समा एक भालेको बासेको कारण छिमेकीबीचको विवाद अदालतसम्म पुगेको छ।
बोरगोइँ जालियूँ गाउँका रिको नामका भालेको मालिक फ्रांकविरुद्ध छिमेकीले "भालेको बासेको आवाजले सुत्न नदिने, एकाग्रतामा समस्या पार्ने र कान दुख्ने" आरोप लगाएर मुद्दा दायर गरेका छन्।
फ्रांकले भालेको खोरमा अटोमेटिक सिस्टम राखेको र बिहान ८ बजे जाडोमा र ९ बजे गर्मीमा खोर खोलिने बताएका छन्। उनका अनुसार रिकोले दिनमा करिब १५ पटक बास्छ। तर, छिमेकीले रिकोको बासेको आवाजले उनीहरूलाई बगैंचामा आराम गर्न र राम्ररी सुत्न बाधा पुगेको गुनासो गरेका छन्।
यो मुद्दाको सुनुवाइ आगामी वर्षको जनवरीमा हुने भनिएको छ। यो मुद्दाले धेरैको ध्यान खिचेको छ, र रिकोको समर्थनमा सामाजिक सञ्जालमा फेसबुक पेजसमेत खोलिएको छ। यसमा धेरै फलोअर्सले रिकोलाई बासिराख्न प्रेरित गरेका छन्।
फ्रान्समा यस प्रकारका विवाद अदालतसम्म पुगेको यो तेस्रो पटक हो, जसले ग्रामीण र शहरी जीवनबीचको सांस्कृतिक अन्तरलाई उजागर गर्छ।
प्रतिक्रिया दिनुहोस