राहत लिएर नेपाली सेनाको टोली म्यानमार प्रस्थान

अञ्जना ढकाल

३ दिन अघि

पाठक संख्या ८६

काठमाडौँ, चैत्र २० - म्यानमारमा हालै गएको विनाशकारी भूकम्पका कारण भएको ठूलो धनजनको क्षतिपछि नेपाली सेनाको टोली बुधबार बिहान राहत सामग्रीसहित त्यसतर्फ प्रस्थान गरेको छ।

नेपाल सरकारको निर्णयअनुसार नेपाली सेनाको आफ्नै जहाजमा प्रमुख सेनानी रामचन्द्र श्रेष्ठको नेतृत्वमा मेडिकल राहतसहित टोली म्यानमार पठाइएको हो।

सेनाका अनुसार उक्त टोलीमा १२ जना चिकित्सकीय टिम, ४ जना बन्दोबस्ती सहायता टिम, ६ जना क्रु सदस्यसहित कुल २२ जना संलग्न छन्। उनीहरूले आवश्यक औषधि, चिकित्सकीय उपकरण तथा अन्य राहत सामग्री लिएर गएका छन्।

टोलीमा सर्जन, अर्थोपेडिक, मेडिसिन चिकित्सक, नर्स तथा प्यारामेडिक्स समेत सहभागी छन्। सेनाका अनुसार उक्त टोलीले करिब एक हप्ता म्यानमारमा भूकम्पपीडितहरूको स्वास्थ्य उपचारमा संलग्न रहि सेवा प्रदान गर्नेछ।