गायिका समीक्षा अधिकारीलाई अभद्र टिप्पणी गर्ने व्यक्तिले मागे माफी

अञ्जना ढकाल

२ महिना अघि

पाठक संख्या २३१

काठमाडौँ, असार ८ -  गायिका समीक्षा अधिकारीलाई सामाजिक सञ्जालमा अभद्र टिप्पणी गर्ने एक प्रयोगकर्ताले सार्वजनिक रूपमा माफी मागेका छन् । अधिकारीले ती प्रयोगकर्ताको अभद्र कमेन्टको स्क्रिनसटसहित सामाजिक सञ्जालमा पोस्ट गरेपछि त्यसप्रति व्यापक चासो देखिएको थियो ।

अधिकारीले सामाजिक सञ्जालमार्फत ती व्यक्तिको कमेन्ट सार्वजनिक गरेपछि ती प्रयोगकर्ताले तुरुन्तै समीक्षा अधिकारीसँग माफी माग्दै लेखेका छन्, "समीक्षा बहिनी, जे लेखियो त्यसका लागि हृदयदेखि माफी माग्छु । यसलाई लामो बनाउनुभन्दा फेरि भेट हुँदा हात जोडेर माफ मागुँला ।"

गायिका अधिकारीले पनि सार्वजनिक माफीलाई स्वीकृति दिँदै ती व्यक्तिको कमेन्टसहितको स्क्रिनसट हटाएकी छन् । उनले लेखेकी छन्, “माफीको दायरालाई मैले नाघ्न सकिनँ, त्यसैले उहाँलाई माफीसँगै सुझाव दिन चाहन्छु — अरूलाई आफ्नो व्यक्तित्व चिनाउनु पूर्व, पहिलो आफूलाई चिन्नुहोस् । सङ्घर्षको मैदानमा लडेर उठेको मान्छे म, अरूलाई लडाउन खोज्दा आफैँ पनि लडिन्छ भन्ने बुझ्न आवश्यक छ ।”

समीक्षाको यस कदमप्रति धेरै सामाजिक सञ्जाल प्रयोगकर्ताले समर्थन जनाएका छन् । उनले देखाएको साहस र व्यवहारिक निर्णयको सराहना गर्दै शुभेच्छुकहरूले उनलाई आफ्नो "मिसन" मा डटेर अघि बढ्न सुझाव दिएका छन् ।

गायिका अधिकारीप्रति गरिएको अभद्र टिप्पणी उनको व्यक्तिगत विगतलाई लिएर गरिएको थियो । उक्त कमेन्ट सार्वजनिक भएपछि उनले ती व्यक्तिको टिप्पणी र आफ्नो परिवारको तस्बिरसहितको पोस्ट सामाजिक सञ्जालमा राखेकी थिइन्, जुन पोस्ट निकै भाइरल भएको थियो ।

यो घटनाले सामाजिक सञ्जालमा हुने अभद्र व्यवहारबारे पुनः बहस सुरु गरिदिएको छ भने समीक्षा अधिकारीको संयमित र सकारात्मक प्रतिक्रिया समाजमा एक उदाहरण बनेको छ ।