भट्टराई दम्पतीले हेरे ‘सिटामोल’, बाबुराम बोले– ‘यस्तो फिल्म विरलै बन्छ’

अञ्जना ढकाल

२ दिन अघि

पाठक संख्या ४२

काठमाडौं, भदौ ४ – माओवादी जनयुद्धपछिको कथा प्रस्तुत गरिएको चलचित्र ‘सिटामोल’ हेरेपछि पूर्वप्रधानमन्त्री बाबुराम भट्टराई निकै भावुक बनेका छन्।

भट्टराईले फिल्म हेरेपछि सामाजिक सञ्जालमार्फत् प्रतिक्रिया दिँदै आफूलाई पटक–पटक आँसु झरेको बताए। “पहिलोपटक यति धेरै भावुक भएँ। यसैबाट यस फिल्मको उत्कृष्टता झल्किन्छ,” उनले भने।

उनका अनुसार विषयवस्तु, कथानक, कलाकारको अभिनयदेखि गीत–संगीतसम्मका सबै पक्ष प्रशंसनीय छन्। उनले ‘सिटामोल’लाई आफूले अहिलेसम्म हेरेका नेपाली फिल्ममध्ये उत्कृष्ट ठहर गरेको बताए।

फिल्मलाई प्रेक्षण गर्दै भट्टराईसँगै उनकी पत्नी तथा पूर्वमन्त्री हिसिला यमी पनि उपस्थित थिइन्।

भट्टराईले नेपाली फिल्मलाई राज्यले कर–मुक्त (ट्याक्स फ्री) गर्नुपर्ने र हलमा प्रोत्साहन दिने खालका नीतिगत सहुलियत उपलब्ध गराउनुपर्ने सुझाव पनि दिए। उनले भने, “हाम्रो फिल्ममा क्षमता छ, तर हलमा शो पाउन समस्या छ। यसलाई राज्यले संरक्षण गर्नुपर्ने हो।”

सन् १९९२ (साल २०४८) तिर नै आफू र आफ्ना सहकर्मीहरूले राष्ट्रिय फिल्म उद्योगलाई समर्थन गर्नुपर्ने माग उठाएको स्मरण गर्दै उनले अझै पनि त्यो आवश्यकता बढिरहेको बताए।

‘सिटामोल’मा माओवादी पूर्वलडाकुहरूको जीवन–संघर्ष प्रस्तुत गरिएको छ। पूर्वलडाकुको योगदानबाट गणतन्त्र सम्भव भए पनि त्यसलाई समृद्धि र स्थायित्वमा रूपान्तरण गर्न कठिनाइ भएको भट्टराईको धारणा छ।

फिल्मका निर्देशकलाई धन्यवाद दिंदै उनले लेखन र सिर्जनात्मकताप्रतिको आफ्नो पुरानो लगाव पनि प्रकट गरे।

सौगात मल्ल र बेनिशा हमाल मुख्य भूमिकामा रहेका ‘सिटामोल’ अहिले देशभरका हलमा प्रदर्शनरत छ।