‘भ्रमको खेती बन्द गरौँ’ – गोरखामा खत्रीको अपिल

अञ्जना ढकाल

३ महिना अघि

पाठक संख्या ८१

काठमाडौँ, फागुन १७ - प्रतिनिधि सभा निर्वाचनको संघारमा गोरखा–१ मा राजनीतिक आरोप–प्रत्यारोप तीव्र बनेको छ। नेपाली कांग्रेसका उम्मेदवार प्रेमकुमार खत्रीले आफूलाई लक्षित गर्दै भ्रमपूर्ण प्रचार गरिएको बताएका छन्।

खत्रीका अनुसार आफूविरुद्ध नक्कली उद्धार प्रकरणमा छानबिन भइरहेको भन्ने हल्ला सुनियोजित रूपमा फैलाइएको हो। उनले यस्तो प्रचारलाई मतदाता झुक्याउने प्रयास र चुनावी स्टन्टको संज्ञा दिएका छन्।

ठमेलस्थित एससीई हिमालयका सञ्चालकसमेत रहेका खत्रीबारे केन्द्रीय अनुसन्धान ब्युरोले अनुसन्धान गरिरहेको भनिए पनि कम्पनीले विज्ञप्ति जारी गर्दै त्यसको खण्डन गरेको छ। सम्बन्धित निकायसँग बुझ्दा कम्पनी वा सञ्चालकविरुद्ध कुनै अनुसन्धान नभएको जानकारी प्राप्त भएको दाबी गरिएको छ।

कांग्रेस गोरखाले पनि चुनावको मुखमा यस्तो प्रचार हुनु आपत्तिजनक भएको बताउँदै तथ्यहीन आरोप बन्द गर्न माग गरेको छ। खत्रीले आफू डेढ वर्षभन्दा बढी समयदेखि सामाजिक अभियानमा सक्रिय रहेको र राजनीतिलाई सेवाको माध्यमका रूपमा लिएको स्पष्ट पारेका छन्।

उता, गोरखा–१ को चुनावी समीकरणमा पूर्वप्रधानमन्त्री डा. बाबुराम भट्टराईको समर्थनले नयाँ आयाम थपिएको छ। उम्मेदवारी फिर्ता लिइसकेपछि उनले कांग्रेसलाई सघाउने निर्णय गरेका हुन्।

यस क्षेत्रमा रास्वपाबाट सुदन गुरुङ, नेकपाबाट हरिराज अधिकारी र एमालेबाट रामचन्द्र लामिछानेसहितका उम्मेदवार प्रतिस्पर्धामा छन्। निर्वाचन नजिकिँदै जाँदा गोरखा–१ को प्रतिस्पर्धा थप चर्किँदै गएको छ।